Giingong patay’ng lawas ni Franz ipalubong na lang

CEBU, Philippines – Lawas sa gikatahong si Franz Sabalones giingong ipalubong na lang sa lokal nga kagamhanan sa Quezon City kon wala gihapoy pamilya nga mo-claim niini sulod sa 60 ka adlaw.

Ang direktor sa Police Regional Office-7 Brigadier General Debold Sinas nagkanayon nga kapin usa ka buwan na nga anaa sa punerarya ang patay’ng lawas ug ilubong na unya kini aron malikayan ang kontaminasyon.

Kini taliwa nga wala pa gyud makompirmar kun kini siya mao ba gyud ang drug lord sa Sugbo nga si Sabalones.

Matud ni Sinas nga anaa na sila’y gitagana nga DNA sample gikan sa patay aron i-match sa sample sa pamilyang mo-claim niini.

“Kailangan gyud parents, anak or igsuon niya”, ni Sinas pa.

Nasayran nga wala nagtakdo ang fingerprint sa patay ngadto sa fingerprint ni Sabalones gikan sa file sa Commission on Elections.

Una nang giklaro ni Sinas nga wala kini nagpasabot nga buhi ang maong drug lord sanglit adunay mga rason nganong wala nagtakdo ang fingerprint niini.

Giingong posible nga laing tawo ang gipapirma ug gipa-fingerprint ni Sabalones ngadto sa Comelec hinungdan nga wala kini magkatakdo.

Karon, ang DNA na lang gyud ang gisaligan sa kapolisan sa pagpamatuod nga ang namatay si Sabalones.

Sa report, gipusil patay ang usa ka lalaki nga gituohang si Sabalones didto sa Barangay South Triangle, Quezon City atol sa Huwebes Santo.

Si Police Major Elmer Monsalve, hepe sa Criminal Investigation Detection Unit sa Quezon City Police District (QCPD)  nagkanayon nga ang ig-agaw niini nga si Joselito Cabilao maoy positibong niila sa gipusil nga mao si Sabalones. (/BDB)(BANAT NEWS)