COMELEC nimando sa pagtangtang sa mga campaign posters

CEBU, Philippines – Gimanduan sa taga Commission on Elections (Comelec) sa siyudad sa Talisay ang tanang mga nikandidato sa miaging piniliay nga limpyuhan ang ilang mga campaign posters nga makita sa nagkadaiyang barangay sa siyudad.

Si Atty. Charise Faith Sojor, election officer sa siyudad nga trabaho sa mga politiko sa pagkuha sa ilang mga posters.

Si Mayor Eduardo Gullas mao sab ang iyang kamanduan sa iyang mga sakop sa Alayon nga manglimpyo.

Iya sab nga gihangyo ang mga kabarangayan nga muhimo sa ingon aron daghan ang maglihok aron sab paspas ang trabaho.

Asoy pa niya nga kun pasagdan lang ang mga campaign posters anha kini mapaingon sa mga kanal nga posibleng mubara sa mga kanal nga maoy hinungdan sa pagbaha.

“Mao sad bitaw nga gamay ra akong gipahimo nga poster,” asoy pa ni Gullas.

Samtang si konsehal Gail Restauro nga sakop sa Alayon ug bag-o lang napili sa ikaduha niini nga termino nitataw nga bisan pa og walay kamanduan siya manglimpyo gyud sa iyang mga tarpaulin ug uban pa nga gigamit sa eleksyon.

Hinuon siya nagpahimo pa og tarpaulin sa pagpasalamat sa Talisaynon diin ang pagtaud niini mao sab ang pagdungan sa pagtang-tang sa iyang mga campaign posters.

Si Atty. Sojor nipahimangno nga kadtong mga nikandidato nga wala mutuman sa ilang kamanduan mag-atubang unya og kaso.

Sa iyang bahin, si  COMELEC Cebu City South District Election Officer Atty. Marchel Sarno miingon mas maayo nga tumanon sa mga nagpapili ang ilang obligasyon human sa piniliay ug lakip niini ang paglimpyo sa ilang mga posters

Kini dili lang ang pagdawat sa hukom sa mga tawo apan lakip na sab ang pagtangtang sa mga campaign materials nga gipamutang ug gipapilit sa nagkadaiyang dapit.

Giawhag ni Sarno ang mga nagpapili naparot man o nakadaog nga tabangan ang ilang ahensiya ingon man ang Lokal nga Kagamhanan sa siyudad sa pagtangtang sa mga campaign materials ilabi na katong gipamutang sa mga kahoy.

“That’s the best ilang mabuhat after election, daog man o pildi, kahibawo ko ang ilang tuyo is panerbisyo siguro ang una nilang buhaton nga serbisyo pag-remove sa posters kay ngil-ad kay ang atuang dalan ug mga kahoy nga daghan kaayo og posters”, dugang ni Sarno. —Decemay Padilla/LPM (BANAT NEWS)