Sinas: Bisan sa aberiya election 2019 malampuson

CEBU, Philippines – Bisan sa mga aberiya nga nasinati gikonsidera nga nagmalampuson ug malinawon ang eleksiyon 2019.

“There is no failure of elections in Central Visayas. We’re happy na nahuman ang elections without major untoward incident”, matud sa direktor sa Police Regional Office-7 Brigadier General Debold Sinas.

Si Sinas nagkanayon nga walay natala nga gi-harass nga mga Board of Election Inspectors (BEI) apan giangkon niini nga wala nila nakab-ot ang zero crime incident sa rehiyon-7.

Apan giingong nikunhod ang krimen atol sa election period ikompara sa niaging tuig.

Sa talaan sa PRO-7, adunay 254 ka krimen ang natala sa tuig 2018 samtang sa 2019 nikunhod kini  ngadto sa 181.

Sa operasyon sa polis batok sa liquor ban adunay 131 ang nasikop ug tulo ka menor ang na-rescue. Samtang siyam ang at large didto sa Negros Oriental human nanagan  pag-abot sa nirespondeng mga polis.

Sa gun ban, unom ka loose firearms ang nasakmit ug 11 ang gitahan ngadto sa mga estasyonan sa polis.

Sa laing bahin, ang Comelec-7 nanghinaot nga dawaton sa mga naparot nga kandidato ang ilang pagkapildi ug mo-move on na kini alang sa kalamboan.

“This is not the end of the world, there are two faces of a coin and somebody will take that role, naa gyu’y mapildi ug modaog”, matud ni Attorney Veronico Petalcorin, direktor sa Comelec-7.

Giawhag ni Petalcorin ang mga kandidato nga maoy mangunay og tangtang sa ilang gipamilit nga mga campaign material aron nga malimpiyo na og balik ang lugar.

Sa laing bahin usab, wala pasagdi sa kadagkoan sa kapolisan ang mga polis nga nibantay diha sa voting centers diin gipang-apuran kini og mga bitamina aron aduna sila’y igong resistensiya ug mga tambal.

Gani, adunay 83 ka polis nga gi-monitor tungod kay taas ang ilang blood pressure ug ang maong mga polis gibantayan nga dili ma-heat stroke.

Kagahapon sa hapon namalik na sa kampo sa PRO-7 ang mga gipang-deploy nga mga polis nga nibantay sa eleksiyon.

Padayag ni Sinas nga hatagan niya og panahon aron makapahuway ang ilang mga polis. (/BDB)(BANAT NEWS)