Seguridad sa piniliay plastada na

CEBU, Philippines — Pwersa sa kapolisan sa rehiyon siete plastada  na sa mga voting centers samtang ang mga voting machines malampusong naabot sa mga polling precints sa mga lugar sa Central Visayas.

Sigon sa direktor sa Police Regional Office-7 nga si Brigadier General Debold Sinas nga wala na silay usbon sa ilang security plan gawas na lang kon adunay mga kakuliang mahitabo.

Matud niya nga dili momenos sa tag duha ka mga polis ang ilang gibutang matag voting centers.

Gawas na lang sa mga lugar nga kinahanglan og daghang security ilabi na kon nabutang sa orange category sa ilang Election Watchlist Areas.

Sa Dakbayan sa Mandaue, bisan pa man og anaa ra kini sa yellow category, tag upat ka mga polis ang gibutang sanglit daghan nang daan og pwersa ang Mandaue City Police Office.

Gani ang MCPO mipalapad sa ilang checkpoints ug pagpatuman sa liquor ban.

Butyag ni Sinas nga aduna usab silay gipakatap nga mga polis nga sakop sa Quick Response Team kay nahimong niyang deriktiba nga dili mahimong biyaan sa nadestinong polis sa voting centers kon adunay kakuliang mahitabo.

Usa pa, dili mamahimong mosulod sa mga voting precincts ang mga polis gawas na lang kon adunay mga emergency nga mahitabo.

Dugang deriktiba sa heneral nga kun magsugod na ang piniliay, magbutang og mga entrance ug exit ang mga polis aron malikayan ang panaghuot sa mga agianan.

Gipahinumduman sab ni Sinas ang publiko ug mga suporter sa politiko nga sugod karong adlawa, gidili na ang pagpanghatag og mga sample ballots ilabi na gawas mismo sa mga voting centers.

Kon masakpan, embargohon kini sa kapolisan ug kon mosukol gani, giingong dakpon nila kini.

Samtang kagahapon, sa labing uwahing datos sa PRO-7, hapsay nga naabot sa mga voting centers ang tanang mga voting machines sa Dakbayan sa Sugbo, Mandaue ug  Lapu-Lapu.

Sa maong datos, anaa pa sa 14% sa mga VM ang naabot sa Bohol;  11 porsyento sa mga VM ang naabot sa Negros Oriental; 7% sa Probinsya sa Sugbo samtang wala pa gyud maabot ang mga VM sa Siquijor.

Niining pagsuwat kasamtangan pa nga gibyahe ang mga VM sa maong mga lugar.

Samtang ang mga ballota gieskortan sab sa mga pwersa sa gobyerno pagkakaadlawon. (Romeo T. Limpangog/DILT)(BANATNEWS)