Cebu City Comelec andam na kayo

CEBU, Philippines — Usa ka adlaw sa dili pa ang piniliay, ang Commission on Elections Cebu City siento porsiyento na nga andam alang niini.

Si South District election officer Atty. Marchel Sarno miingon nga ang  ilang mga gikinahanglang gamit ug materyales nahan-ay na alang sa piniliay.

Matud niini, ang Vote Counting Machines (VCMs), balota, certified list sa mga registered voters, precincts certified voters lists ug uban pa, nahatud na sab.

Gawas niini, nagmalampuson usab sila sa pagsusi sa mga VCMs niadtong Biyernes apan una na niyang gibutyag nga adunay 70 ka contingency VCMs nga giandam nga maoy ihulip kon ugaling adunay mga machines nga maguba.

“At our end sa office, we are 100% for the preparation. We are two days ahead before the holding of election, more on the monitoring nalang”, butyag ni Sarno.

Gawas sa kumpletong delivery sa mga supplies ug materials, asoy ni Sarno nga ang iyang buhatan nahuman na sab sa tanang kalihukan sama sa coordination sa partner agencies ug training sa electoral board members. Matud niya nga mitagana sila og igong oras sa pagpangandam aron masiguro ang malampuson ug hapsay nga pagpahigayon sa eleksiyon.

“On our end sa office, confident mi nga wala mi nalantawan nga pagkuwang kay kining among preparation, dili man lang kining karon lang nga election kundi pila na ka eleksyon ang niagi”, ni Sarno pa.

Sa adlaw sa piniliay, giawhag ni Sarno ang mga botante nga magdala og kaugalingong lista kon kinsa ang ilang botaran aron dali ra sila mahuman sa pagbotar.

Gipahinumduman sab niini ang publiko nga dili modawat og sample ballot gikan sa bisan kinsa nga mga politiko dungan sa pagbutyag nga ang ilang desisyon subay na sa ilang kabubut-on.

Samtang ang Comelec mo-establisar og voter’s assistance desks aron pag-akomodar sa tanang voting-related concerns. (/DILT)(BANATNEWS)