Garma buot pahulipan ni Tomas

CEBU, Philippines – Gusto ni Cebu City Mayor Tomas Osmeña nga mapapahawa si Cebu City Police Office Director Police Colonel Royina Garma.

Ang mayor ug ang kapolisan sa siyudad, walay maayong relasyon human si Osmeña mialegar nga ang kapolisan gigamit sa politika.

Ang gipasabot ni Osmeña niini mao ang giingong nahitabo sa iyang mga kaalyadong kapitan ug mga lider diin ang ilang mga balay girakrakan ug giingong aduna say gipangdapatan ug ang gipasanginlan sa mayor nga mihimo niini ang kapolisan.

Atol sa 888 News Forum, ang mayor mipadayag nga mas maayong si kanhi CCPO director PSSupt. Joel Doria maoy mahimong hepe sa rehiyon.

“I think Doria did an excellent job here in Cebu and I wish it would him not only Chief of Police but make him replace Sinas itself and I think we will have a better situation that will be more manageable”, ni Osmeña pa.

Gani si Senador Panfilo Lacson, nanawagan sa Commission on Elections nga susihon ang giingong paglambigit sa kapolisan sa politika butang nga gihangop sa mayor.

Subay niini, nagplano si Osmeña nga mopadala og suwat ngadto sa Comelec nga maglatid sa kasamtangang sitwasyon sa siyudad niining panahona.

Samtang si CCPO director Garma mihagit kang Osmeña nga mopasaka na lang og kaso sa tanang alegasyon niini sa kapolisan.

Sigon sa direktor atol sa phone interview, gikapoy na siya og tubag sa media sa mga atake sa mayor mao nga maghuwat na lang siya og subpoena gikan sa korte.

Nasayran nga bag-ong gi-post sa social media sa mayor mao ang kuha sa CCTV sa giingong pugsanong pagsulod sa mga sakop sa Special Weapons and Tactics sa balay ni Kasambagan Barangay Captain Jojo Quijano diin armado og mga long firearm ang mga operatiba.

Subay niini, matud ni Garma nga wala siya mosumbong kang Presidente Rodrigo Duterte sa nahitabo kanila sa mayor ug wala usab kini mahisguti atol sa ilang meeting kay ang tumong niya sa presidente mao ang pag-introduce sa babayeng police security aide nga iyang pa-aplayon sanglit nangita ang presidente ug dugang aide.

Laing gibutyag ni Garma mao ang pagpahigayon usab og checkpoint palibot sa lugar diin himuon ang meting de avance sa Partido Barug karong adlawa isip pagpakita nga wala silay gidapigang politiko.

Kahinumduman nga nahimo kining isyu dihang mihimo og susamang kalihukan ang BOPK niadtong miaging adlaw.

Gipasabot ni Garma nga kining tanan lakip sa ilang security preparation karong panahon sa piniliay.

Sa laing bahin, ang mayor midepensa sa iyang kaugalingon kabahin sa isyu nga iyang giatubang karon diin nakuhaan siya og hulagway samtang nagduwa og poker sa usa ka giingong ilegal nga pasugalan sa may Brgy. Camputhaw.

Matud sa mayor nga matag eleksiyon kanunay siyang akusahan og bisan unsa nga isyu mao nga alang niya normal nalang kini. Adto na sab niya tubagon sa saktong lugar kon siya ba gyud ang anaa sa hulagway.

“I will answer it in the proper forum. Let them present their case, I’ve not even seen it so let them present their case”, matud sa mayor. (Camille L. Pateres/DILT)(BANAT NEWS)