Miting de Avance sa BOPK gidagsa
CEBU, Philippines — Midagsa ang gibanabanang kapin 20 mil ka mga dumadapig sa Bando Osmeña Pundok Kauswagan (BOPK) atol sa ilang miting de avance diha sa Cebu City Sports Center (CCSC) kagahapon.
Si Mayor Tomas Osmeña subling magpapili pagka-mayor sa siyudad sa Sugbo, ang bise mayor niini mao si Konsehal Mary Ann delos Santos.
Apil sa namambong ang ilang mga kandidato sa pagkakonsehal ug kongresista sa north ug south districts nga silang incumbent congressmen Rodrigo Abellanosa ug Raul del Mar sa North District.
Ang mga Konsehal nga magpapili gilangkuban nila ni Dave Tumulak, Eugenio Gabuya Jr., Raul Alcoseba, Roberto Cabarrubias, Kirk Bryan Repollo, Rengelle Pelayo, Marie Velle Abella ug Michael Gacasan sa South Districr.
Sa North District mao sila si Sisinio Andales, Alvin Arcilla, Nestor Archival, Alvin Dizon, Jerry Guardo, Lea Japson, Marlo Maamo ug Joy Augustus Young.
Usa sab ka audio presentation ang gipapaminaw diin nagdetalye sa matud pa pagpang-harass sa kapulisan sa ilang mga kaalyadong kapitan, dumadapig ingon man sa ilang mga leaders.
Human sa audio-video presentation gisunod dayon ang santos nga misa nga gipangulohan Rev. Fr. Erik Osorio.
Gawas pa niana, aduna pa usab siyay gipabuhagay nga sensitibo ug seryosong alegasyon batok sa usa ka opisyal sa kapolisan kinsa wala pa kakuhai og habig maong gipugngan una sa Banat News.
Si delos Santos nalipay gihapon nga daghan ang nitambong bisan pa sa nahitabong matud pa pagpang-harass kanila. Matud niya ang eleksyon karong tuiga sa siyudad mao ang pinaka-hugaw tungod gigamit ang kapulisan.
Si kanhi senador ug igsuon sa mayor nga si Serge Osmeña kinsa magpapili pagka senador mitambong sab ug miawhag sa mga supporters nga di mahadlok nunot niining mga pagpanghasi nga gibuhat kanila.
Matud pa niya, makaduda kaayo nga ang mga taga BOPK lang kanunay ang gi target.
“That is proof that the administration is out to down my brother Tommy and it’s not fair because nganong ila man gigamit ang mga police sa paghampas sa tawo?” sumala pang Serge.
Ang kadagkoan sa kapolisan gisuwayan pagkuha sa ilang habig bahin sa maong mga pasangil apan walay mitubag kanila. (/IBM)(BANATNEWS)
- Latest
