Osmeña namasangil nga gipuntariya iyang grupo

CEBU, Philippines — Walay laing gidudahan si Cebu City Mayor Tomas Osmeña sa pagpangrakrak sa balay sa usa sa iyang mga kaalyado Sabado sa gabii diha sa Barangay Sudlon I kondili ang mga polis maoy nagbuhat niini.

“To me klaro kaayo police to, way lain gyud, sila naghimo sa checkpoint, sila nagtuyok-tuyok, ilang gi-cover ilang nawong,” matud ni Osmeña dihang gi-interview sa mga tigbalita.

Niadtong nakalabay nga gabii, girakrakan sab ang show room sa mga baligyang sakyanan ni Kasambagang Barangay Captain ug ABC President Franklyn Ong sa Mandaue City. Si Ong, kaalyado ni Osmeña.

Gihulagway sa mayor nga gi-terrorized sa kapulisan ang mga dumadapig sa Bando Osmeña Pundok Kauswagan (BOPK).

“Ilang gipili ang BOPK, ilang gi-target nagsugod ni Adonis Dumpit, si Cadungog, ilang gi-football akong mga security wa sila’y kalibutan didto sa gawas dili sila mohatag og building permit kanako so I will be terrified, I’m not terrified,” dugang ni Osmeña.

Gitawag ni Osmeña nga talawan ang mga tawo nga naghimo sa ingon kay giingong mga gagmay’ng tawo ang gipunterya nga dili makadepensa sa kaugalingon.

Nagtuo siyang mas mo-grabe pa ang mga panghitabo karon nga nagkaduol na ang eleksiyon apan gipasalig sa mayor nga dili siya modagan.

“This is not going to stop, akong gihangyo sa tanan we have to take a stand because sa pagkakaron dili formal but we have martial law”, sa Mayor pa.(

Sa pikas bahin, walay planong mobiya pagka pangulo Barangay Mayor’s Office si Amor Cabilis, kansang balay maoy girakrakan.

Sa phone interview kaniya kini miingon wala siya’y ideya kun kinsay nagpaluyo sa pagpangrakrak sa iyang balay apan nagtuo siyang  kini may kalambigitan sa politika tungod kay supporter siya sa  mayor.

Nakadungog siya og buto sa armas gikan sa mga tawo nga naa sa atubangang bahin sa balay niini nga luwan og motorsiklo.

“11:33 naa’y motor duha nga nihunong atubangan sa balay, unya pagkahuman, diretso og rakrak,” matud ni Cabilis.

Apan ang balay nga girakrakan wala nay nagpuyo kay matud pang Cabilis gibiyaan nila kini kay dunay nakatambag kanila nga mobalhin una kay uso kaayo ang pagpangrakrak sa bukirang barangay.

“Gi-safety na nako akong mga anak sa lain nga barangay, mga dugay-dugay gi-safety. Kami nalang ang nagpa-atbang permanente sa balay para makibaw ta sa mahitabo ba,” dugang ni Cabilis.

Sa iyang bahin, si Dinefer Aguilar sa Bids and Awards Committee(BAC) miasoy nga dunay lima ka wala mailhing mga tawo nga miadto sa ilang balay pasado alas 11 sa gabii niadtong Sabado.

Ang lima giingong nanuktok sa pultahan nga nakapaaghat kaniya pag-secure sa iyang bana ug 2-anyos niining anak sa kwarto apan gipatiran sa mga lalaki ang pultahan ug naabli.

Matud niya gisagpa siya sa mga lalaki ug gibaharang balikan kun dili sila mamahawa.

Sama kang Cabilis, wala siya makaila sa maong mga tawo bisan og wala sila magsul-ob og mask apan kini miasoy nga Tagalog ang inistoryahan sa maong mga tawo.

“Ang akong gidudahan politics kay solid supporter ko sa BOPK, about politics. Mao na akong duda kay wala man ko’y kalaban unya dili pud ko kriminal,” sigon ni Aguilar.

Ang duha parehong wala pa mo-report sa kapolisan bahin sa maong pagpanghasi. (/IBM)(BANATNEWS)