Greek, ginang gidakop tungod sa pagdala’g bata
CEBU, Philippines – Usa ka Greek national ang gidakop sa kapolisan human nakit-ang nagkuyog og minor de edad sulod sa Cebu South Bus Terminal (CSBT). Kalapasan sa Republic Act 7610 o Anti Child Abuse ug RA 9208 Anti-Trafficking in Persons Act of 2003 ang giatubang ni Stefanos Karakatsanis, 80, nagpuyo sa usa ka condominium sa Banawa, Barangay Guadalupe sa Dakbayan sa Sugbo.
Laing suspek mao ang stepmother sa 15- anyos nga dalagita nga taga Dumaguete City.
Sa blotter report sa Carbon Police Station, nakita ang langyaw nga naghuwat sa bata ug sa stepmother niini sa ilang pag-abot diha sa terminal niadtong Abril 30 pasado alas 8 sa gabii. Dayon nag-estorya ang duha ka suspek uban sa bata. “…after the conversation, Mr. Stefanos Karakatsanis touched the hips, hand and face of the minor and later gave three thousand (P3, 000) to suspect #2” pagbasa sa report sa police.
Sa dihang giduol sa mga polis nga nadestino sa CSBT ug gi-interview walay napakita nga supporting documents ang duha sa koneksyon o affiliation nila ngadto sa minor de edad.
Tungod niini, giaresto nilang PCpl. Ryan Christopher Morales, PCpl. Frederick Tormon nga sakop sa Provincial Mobile Force Company.
Si Jonathan “Joy” Tumulak ang operations manager sa CSBT nagkanayon nga base sa gisulti ni Karakatsanis, iyang himuong katabang sa iyang condominium ug paeskuylahon ang maong bata. Matud ni Tumulak nga managkaila ang langyaw ug ang stepmother sa bata. “Bisan pa og naay pagtugot gikan sa ginikanan, kung minor de edad ang babaye o ang bata, pwede gihapon ka nga (makasohan og) human trafficking,” matud ni Tumulak.
Ang bata anaa karon sa kustodiya sa Department of Social Welfare and Development (DSWD). (/IBM)(BANAT NEWS)
- Latest
