Dashcams di pa mahatag ngadto sa mga drivers

CEBU, Philippines – Naghuwat nalang ang kagamhanan sa Siyudad sa Sugbo nga tugotan sa Commission on Elections labot sa pagpanghatag sa libreng dashboard cameras ngadto sa mga Public Utility Jeepney (PUJ) drivers.

Kini human mi-file sila og petition ngadto sa Comelec aron tugotan sila nga makapang-apud-apod sa security cameras sanglit napalit man kini sa wala pa ang election period.

Duha ka semana na ang nakalabay dihang mi-file ang kagamhanan sa ilang petisyon, gani sa pagkutlo ning maong balita, ang ilang mga abogado naa man sa kaulohan aron motambong og hearing labot niini.

Sigon ni Assistant City Administrator Annabeth Cuizon nga buot maniguro ang kagamhanan sa siyudad nga wala silay malapas nga election rules sa distribution sa dashboard cameras sa mga drivers. 

Ang operations chief sa Cebu City Transportation Office Francisco Ouano miingon nga niadtong miaging buwan unta nila ipang-apud-apod ang dashcams apan gumikan sa petisyon, wala una nila kini gidayon.

Matud niini, usa ka libo ka dashboard cameras ang na-deliver sa miaging buwan ug andam na kini alang sa distribution. Nakadesisyon ang kagamhanan nga mopalit og dashboard cameras aron pagpugong sa krimen ug pagpalambo sa peace and order situation sa siyudad.

Sukad niadtong buwan sa Marso ang CCTO nagsugod na og panawat og official receipt, franchise, ug travel line certificate isip rekisitos sa gustong mopahimulos niini.

Makita sa record nga dunay 600 ka PUJ drivers ang nakakuha og travel line certificate sa siyudad.

“Makita nato ang safety sa pasahero inig dayong sakay kay daghan kaayo holdupper, daghan kay mga binuang sulod sa PUJ so ang ato dinha dako gyud kaayo siya og ikatabang not only sa driver at the same time sa pasahero sad”, matud ni Ouano. (/DILT)(BANAT NEWS)