Magpale labing adunahan base sa iyang SALN
CEBU, Philippines – Si Bise Gobernador Agnes Magpale ang labing adunahan nga elected official sa Kapitolyo base sa Statement of Assets Liabilities and Networth (SALN) niini sa tuig 2018.
Si Magpale adunay P62.6 milyones nga net worth sa tuig 2018 nga gilangkuban sa iyang total assets ug wala siya’y utang.
Ug dako kini itandi sa P60.7 milyones nga net worth sa tuig 2017.
Base sa SALN ni Magpale, ang real properties niini nikabat sa P17.8 milyones nga gilangkuban sa usa ka agricultural property sa Nueva Ecija; tulo ka residential property sa Banilad, Dakbayan sa Sugbo ug usa sa Dakbayan sa Danao; Upat ka commercial property sa Dakbayan sa Danao, Las Piñas ug Ayala Manila ug usa ka mixed used property sa Lungsod sa Tuburan.
Ang personal properties ni Magpale nikabat ngadto sa P44.8 milyones sa tuig 2018. Nagsunod kang Magpale si 4th district provincial board member Horacio Franco nga adunay P51.9 milyones nga total assets ug walay utang, nagsunod niya si Bokal Jose Marie “Tata” Salvador nga adunay P47.9 milyones nga total assets ug walay liabilities.
Si Salvador maoy labing adunahan nga elected official sa Kapitolyo niadtng tuig 2017 diin siya nideklarar og P43.5 milyones nga net worth.
Sunod kang Salvador si Bokal Thadeo Jovito “Jonkie” Ouano nga niabot sa P36 milyones ang assets ug adunay utang nga P1.113 milyon ug aduna kini P34.9 milyones nga net worth. Ikalima sa labing adunahan nga elected official mao si Bokal Alex Binghay nga P29.90 milyones ang total assets ug utang nga P3.67 milyones ug aduna kini P26.232 milyones ang net worth.
Si Gobernador Hilario Davide, III nisaka usab ang net worth nga gideklara niini sa tuig 2018 base sa iyang SALN nikabat sa P17,210,049 ang iyang assets ug adunay P100 mil nga utang diin taas kon itandi sa P16.6 milyones nga net worth niadtong 2017. (/BDB)(BANAT NEWS)
- Latest
