Papal Nuncio: Ayaw paggapos sa cellphones

CEBU, Philippines — Malampuson ug mabulokon ang pagtak-op sa National Youth Day 2019 nga gipahigayon sa Dakbayan sa Sugbo sugod niadtong Abril 23 nga gitapos  kagahapon sa buntag nga giapilan sa dili mominos 12mil ka mga kabatan-onan gikan sa nagkadaiyang lugar sa nasud.

Gabii sa adlaw nga Sabado usa ka tigum kauban ang mga kaobispohan ug ang Papal Nuncio sa Pilipinas nga Italyanong si Archbishop Gabrielle Giordano Caccia, kinsa nitubag sa mga pangutana sa mga kabatan-onan lakip ang mga nagkadaiyang isyu bisan mga kontrobersyal.

Human sa Nights with the Bishops, gisunod gilayon ang Hudyaka festival nga maoy nagtak-op sa kalihukan sa adlaw nga Sabado. Domingo sa kaadlawon usa ka rosary ang gihimo sa mga kabatan-onan nga gisundan sa Santos nga Misa nga gipangulohan ni Caccia uban sa dili mominos 20 kapin ka mga obispo ug lakip usab sa mga kaparian nga gikan sa nagkadaiyang diocese ug archdiocese . Matud pa ni Caccia ngadto sa mga kabatan-onan nga ang Ginoo buhi ug kini ang paglaum sa tanan ug dili kini mobiya ilabi na sa mga naa sa kalisdanan ug pagsuway.

Samtang gi-awhag usab niya ang kabataan nga dili magpaka-adik sa mga gadgets sama sa celphones. Matud niya importante kaayo ang pagpamalandong inay nga mahurot ang oras sa pagsige og tuplok sa mga cellphones.

“Most young people and also not young people are a bit afraid of silence. Can you stay any minute without watching your mobile (phone)? I doubt after three minutes somebody will get bored and cannot bear the silence.... We need silence in life,” matud ni Caccia sa iyang 20-minutos nga homiliya. “Free yourself from cellphone addiction please. Mobile is a great help, it’s a great progress... but when you become a slave of the phone, you lose your freedom. When mobile phone (becomes a) drag, communication is reduced to simple contacts. But life is not (just about making) contact, it is to communicate,” matud niya. Human sa selebrasyon gisunod usab ang pag turnover sa NYD2019 Cross gikan sa Archdiocese of Cebu ngadto sa Archdiocese of Caceres sa Bicol Region alang sa sunod nga NYD2021.

Si Cebu Archbishop Jose Palma, mapasalamaton sa tanan sa kalampusan sa maong kalihokan ug malaumon siya nga daghan napupo nga maayong kasinatian ug mga pagtulon-an ang mga kabatan-onan nga nanambong ug bitbiton nila kini pabalik sa ilang tagsa-tagsa ka parokya.

Sa pikas bahin, ang direktor sa Cebu City Police Office nga si Police Colonel Royina Garma nagkanayon nga  wala silay natalang krimen nga  nakabalda sa NYD19. (Camille Pateres/ ug report gikan sa The Freeman/IBM)