Papal Nuncio motambong sa kataposang adlaw sa NYD

CEBU, Philippines – Gilauman sa Police Regional Office (PRO)-7 ang pag-abot sa Papal Nuncio o ang direct diplomatic nga representante ni Pope Francis sa kataposang bahin sa National Youth Day (NYD) 2019. Si Police Brigadier General Debold Sinas nikompirma nga hugot ang ipakatap nga seguridad atol sa pag-abot sa Papal Nuncio karong Sabado.

“All security preparations are done. We are ready for the day the Papal Nuncio is expected to arrive. No immediate threats monitored”, matud ni Sinas.

Sa laing bahin, ang direktor sa Cebu City Police Office Police Colonel Royina Garma nagkanayon nga adunay mga police ang ipakatap nga mo-secure sa lugar sa kataposang bahin sa NYD.  Matud ni Garma nga bisan kadtong dili apil sa deployment apan motambong sa kalihukan alang sa personal nga katuyoan ang gipaubos usab sa briefing aron mahimong force multiplier diha sa field.  “May polis na naka-deployed, and we are hoping and making sure na peaceful ang magiging final day ng mga activities”, matud ni Garma.

Nunot niini, gipaabot nga makasinati og kahuot sa trapiko ang Dakbayan sa Sugbo atol sa pagtak-op sa National Youth Day 2019 tungod kay adunay sirad-an nga dalan gikan sa Capitol padulong sa Cebu  City Sports Center tungod sa ipahigayon nga Pilgrim Walk.

Matud ni Frankel Margallo, youth coordinator sa NYD2019 nga usa ka pilgrim walk ang buhaton sa mga kabatan-onan isip kabahin sa programa ug magtapok diha sa City Sports Center. Gawas sa lakaw sa mga batan-on adunay “talk with the bishops and friends” ug uban pa. (/BDB)(BANAT NEWS)