Way basehan aron i-Comelec control ang Cebu City

CEBU, Philippines – Si Police Regional Office-7 Director Debold Sinas nagkanayon nga walay igong basehan aron ibutang sa Comelec control ang Dakbayan sa Sugbo sanglit hapsay ug malinawon ang syudad.

Gani, sa Election Watchlist Areas nga ilang gitumbok kauban sa mga membro sa Joint Peace and Security Coordinating Council (JPSCC), anaa ra sa yellow category ang dakbayan nunot  ra sa “intense political rivalry.”

Gipasabot sa heneral nga ibutang lang ang usa ka lugar ubos sa Comelec control kun hasta ang mga buhatan sa gobiyerno nagkagubot na sab ug wala na mi-function og tarong.

“There’s no ground to recommend. Everything is functioning, kabalo mo if we recommend COMELEC control, there is a breakdown of the traditional government organizations or kung ang court nato wala na, naa nay chaos that is the time. (As of now) Everything is functioning as it is,” sigun ni Sinas.

Si Cebu City Mayor Tomas Osmeña nangusog nga mabutang ang siyudad ubos sa Comelec control  karong piniliay. Ang iyang rason mao nga may kagubot karong piniliay tungod sa nahitabong pagpangrakrak sa mga balay sa duha niya ka alyadong mga kapitan: Silang Sudlon dos Barangay Captain Prescillo Albores ug Sinsin Barangay Captain Aurelio Laspoña niadtong Abril 4, Huwebes sa kaadlawon.

Kun ang usa ka lugar ipaubos sa kontrol sa maong ahensya, ang Comelec na maoy dunay kontrol sa tanang ahensya sa gobiyerno sa maong dapit apil niini ang kapolisan.

“Everything is functioning as it is kadtong nag-estorya siguro nga i-Comelec control, siya lang siguro wala nag function, all government offices functions and performs their jobs,” sigun pa ni Sinas nga wala mohingalan sa mayor.

Matud ni Sinas nga sila sa PNP ug sa Armadong Kusog sa Pilipinas maoy moproseso sa lugar ug maoy mohimo og rekomendasyon ngadto sa Comelec kun angay bang i-Comelec control ang usa ka lugar. Kun basehan ang Comelec resolution number 10481, ang grounds aron mapaubos sa Comelec control ang usa ka lugar mao ang: adunay intense political rivalry diin sakyan og mga bayolenteng buhat; ang binuhatan iya sa usa ka Private Armed Groups; paggamit og mga loose firearms sa mga ‘unqualified individuals’; ug hulga sa terorismo.

Base sa maong resolusyon, mamahimo rang morekomendar ngadto sa Comelec si bisan kinsang tawo pinaagi sa pagpadala og petition letter kauban ang Clerk of the Commission sa maong ahensya.

Sa pikas bahin, gipahibalo ni Sinas nga moabot og nuwebe mil  ka polis ang i-deploy atol sa piniliay. (Rowena Capistrano/IBM)(BANAT NEWS)