Negosyo sa San Fernando apektado sa nahitabong krimen

CEBU, Philippines — Mitiyabaw na ang mga negosyante sa Lungsod sa San Fernando gumikan sa paghinay sa ilang mga negosyo nunot sa sunod-sunod nga nahitabong patay sa maong lungsod.

Sa gihimo nga Peace and Order Council Meeting kagahapon sa buntag gipaabot ni Violeta Musngi, sakop sa board of trustees sa Chamber of Commerce and Industry nga ang tag-iya sa Taheiyo Cement, wala na motaak sa lungsod human sa nahitabong patay sa lugar. Matud ni Musngi nga moanhi man sa Pilipinas ang tag-iya sa kompaniya apan ang iya nalang mga lokal nga sakop ang pasuroyon sa ilang planta.

Si Mary Jane Cebrian, miyembro sab sa maong organisasyon miingon nga ang ilang kompaniya nga Pulchra Resort nakasinati sab og pagsuway human menus ang nagpa-book bisan og tingbakasyon.

Ilang gipasanginlan ang mga hitabo nga krimen sa maong lungsod, apan siya nanghinaut nga molambo ra kini og balik.

Si Mayor Lakambini “Neneth” Reluya nagkanayon nga subo nga pamalandungon ang pamahayag sa sektor sa negosyo. Iyang gitataw nga dili unta kini mahitabo kon magtinabangay ang katawhan sa pagbulgar sa mga tawo nga responsable sa pagpamatay. Nunot niini, nasabutan atol sa maong panagtigum nga mohimo og task force alang sa kalinaw sa lungsod ilabi na nga nagsingabot ang piniliay. Si PSInsp. Lymel Pasquin, hepe sa San Fernando Police Station miingon nga inanay na nilang nasulbad ang ubang krimen ug problema sa ilegal nga drugas.

Laing resulta sa maong meeting mao ang pagpagawas og executive order ni Mayor Reluya sa pagdili na pagsul-ob og bonnet sa lungsod.

Subay usab kini sa daghang sumbong nga iyang nadawat nga adunay presensya sa mga tawo nga magsul-ob og bonnet ilabi na sa kabukiran mao nga nabalaka sila niini.

Wala hinuoy silot sa masakpan nga magsul-ob og bonnet apan ipaagi kini sa interogasyon sa kapolisan.

Ang pagsita sa magsul-ob og bonnet epektibo sugod karon hangtud na sa Hunyo 30 niining tuiga. DILT (BANAT NEWS)