Aktibong polis, maestra gibanhigan samtang nagsunod sa prosisyon

CEBU, Philippines — Aktibong polis naangol apil ang igsuon niining maestra human siya gibanhigan samtang nagsunod sa procession atol sa Biyernes Santo didto sa Sitio Pajo, Barangay Poblacion, Samboan.

Giila sa kapolisan ang biktima nga si Police Master Sergeant Roy Cavalida, residente sa Barangay Talamban, Dakbayan sa Sugbo ug lumad nga taga Pajo, Barangay Poblacion, Samboan ug nadestino sa Police Regional Office-7 Regional Headquarters.

Samtang ang igsuon niini giila sab nga si Nanette Cavalida-Deparine.

Sigun pa sa hepe sa kapolisan sa Samboan nga si Police Lieutenant Warlito Toñacao, si Cavalida maoy nagmaneho sa iyang sakyanan nga silver nga Honda Civic ug sakay niini ang iyang tulo ka mga igsuon ug ang usa niya ka bayaw gikan nanimba ug paingon na mopauli sa balay.

Apan matud pa nga nag-aginod ra iyang dagan kay nagsunod sila sa foot procession. Gibana-banang 200 meters na lang unta ang gilay-on sa ilang panimalay dihang gisugat si Cavalida og usa ka riding-in-tandem ug gipusil siya sa angkas niini.

Sakay sa usa ka Mio Scooter ang duha ka mamumuno nga nagsul-ob pa gyud og bonnet ug helmet.

Gikan sa gilingkorang driver’s seat, miikyas ang polis gawas sa pultahan sa front passenger seat ug midagan paingon sa kalibonan ug nakabawos pagpusil sa mga lalaki gamit iyang .9mm nga service firearm.

Atol sa maong hitabo, naigo ang sampot ni Deparine sa saag nga bala dihang misuway kini og kanaog sa sakyanan.

Nabiyaan sa kalibonan si Cavalida samtang gidagan sa tambalanan ang igsuon niining maestra.

Giingong mga polis sa Samboan na ang mitawag og ambulansya aron nga madala kini sa tambalanan si Cavalida.

Daghan sab ang nakakita nga misutoy og dagan ang mga mamumuno paingon sa direksyon sa Dakbayan sa Sugbo.

Nakahiagom og duha ka mga samad pinusilan sa iyang wala nga paa si Cavalida ug aduna sab sa iyang kilid ug  samad sab sa tiyan nunot sa mga buak nga bildo sa iyang windshield.

Sa crime scene, dunay nahipos nga 18 ka basiyo sa bala sa M16 ug pipila sab ka basiyo sa 9mm ang kapolisan.

Apan wala na na-recover ang pusil ni Cavalida sanglit nawala kini atol sa pinusilay ug sa dihang napalgan kini sa laing bayaw niini nga retired police, giingong gitunol kini diretso kang Cavalida didto sa hospital.

Plano karon sa hepe nga pasakaan og obstruction of justice ang maong retiradong polis sa pagdala sa maong pusil sanglit giisip kadtong ebidensya.

Kagahapon sa udto gihatud sa maong retiradong polis ang maong armas aron di mapasakaan og kaso.

Sa inisyal nga imbestigasyon, butyag sa hepe nga pipila ka oras sa wala pa nahitabo ang krimen aduna nay tulo ka paresan sa riding-in-tandem nga nagsunod-sunod sa biktima.

Pangagpas ni Tuñacao nga si Cavalida ra gyud ang target ug giatngan kini nga makauli sa Samboan.

Wala mobutyag si Tuñacao bahin sa ilang gitutokang motibo sa ambush apan gitug-an niyang nakadawat sila og impormasyon nga naapil sa listahan ni Presidente Rodrigo Duterte nga mga ‘Ninja cops’ o mga polis nga nalambigit sa illegal nga transaksyon sa drugas si Cavalida.

“Based sa naabot sa atoa (impormasyon),  sa una na-assign ni siya sa PIB, nahimo kuno ning Ninja cop, naapil na siya sa listahan kuno based on info nga atong nadawat,” sigun ni Tuñacao. Apan base sa gipagawas nga listahan ni Duterte niadtong Agosto 2016, wala didto ang pangalan ni Cavalida. (Rowena Capistrano/IBM)(BANATNEWS)