Walay hulga apan full alert status

CEBU, Philippines – Ang kapolisan sa Lalawigan sa Sugbo miingon nga wala silay namonitor nga hulga sa seguridad subay sa Semana Santa.

“So far walang reported na immediate threat that may affect the celebration ng ating Holy Week,” sigon pa sa direktor sa Cebu Provincial Police Office nga si Police Colonel Manuel Javier Abrugena.

Taliwa niini, magpadala sila og augmentation gikan sa Provincial Mobile Force Company aron moabag sa seguridad.

Sugod karong adlawa, isang-at ang tibuok rehiyon siyete sa full alert status isip pagpangandam sa pagdagsa sa mga tawo sa mga simbahan, ingon man ang mga tourist destination.

Subay niini, si Abrugena miingon nga magpahigayon sila og run through karong adlawa sa mga security nga ilang gipamutang ilabi na sa mga wharf sa isla sa Bantayan ug sa San Remigio diin giatngan nga dagsaon gyud og mga tawo karong panahona.

“Sa Santa Fe, not only sa simbahan pati na yung wharf at yung mga kalsada leading to other municipalities,” sigon sa direktor.

Nakig-alayon na sab sila sa mga Disaster Risk Reduction Management Offices sa kalungsuran ug dakbayan.

Samtang niadtong Abril 12 hangtud Abril 22, heightened alert ang Mactan-Cebu International Airport alang sa gipaabot nga pagdagsa sa mga pasahero nga moabot ug biya sa Sugbo karong panahona.

Sa press release nga gipagawas sa kadagkuan sa maong tugpahanan, alerto na ang tanang security personnel sa MCIA sulod sa 24 oras.

“This will also guarantee immediate response for any untoward incident within the airport during the Holy Week,” matud ni Mactan-Cebu International Airport Authority General Manager ug CEO Atty. Steve Yuhico-Dicdican.

Ang maong pag-alerto subay kini sa gipatuman nga Oplan Biyaheng Ayos alang sa hapsay nga operasyon sa tugpahanan.

Subay niini ang MCIA, magset-up kini og help desk sa mga “prominent” areas sa maong tugpahanan lakip na usab sa “information banners”  aron nga makahatag og dali nga tabang sa mga pasahero.

Ang maong desk, gidumala kini sa mga GMCAC customer service executives, airport medical staff, MCIAA public relations representatives, security personnel gikan sa MCIAA Airport Police Division, ug representatives sa Department of Tourism.

Ang MCIA miawhag usab sa mga pasahero nga i-confirm daan ang flight details ngadto sa mga airlines sa dili pa moadto sa airport.

Giawhag usab ang mga pasahero nga mogamit og online check-in facility sa ilang airlines o sa self-service check-in kiosks nga anaa sa departure area alang sa mas hapsay nga proseso sa ilang pag check-in sulod sa MCIA. (Le Phyllis F. Antojado/DILT)(BANAT NEWS)