Duha ka basketball ring gipakuha ni Cabigas

CEBU, Philippines — Dali nga gikuha sa buhatan ni konsehal Rodi Cabigas ang duha ka basketball ring nga gibutang diha sa karsada sa Barangay Poblacion, Dakbayan sa Talisay human kini gisaway sa kadaghanan.

Gihimo una nila nga temporaryong basketball court ang karsada samtang giingong gipatukod pa ang laing basketball court.

Gani nisaad si Cabigas nga sulod sa duha ka buwan ilang mahuman ang basketball court nga gitukod apan hangtud karon wala kini matuman.

Ang mga manindahay diha sa lugar diin nahimutang ang temporaryong basketball court ang nagbagotbot  tungod kay nakahatag kini og kahasol kanila ilabi na nga ang bola malagpot paingon sa ilang tindahan.

Human sa mga reklamo daling gipakuha kagahapon ni Cabigas ang duha ka basketball ring nga gipahimutang diha tunga sa karsada.

Ug sa pagtangtang kagahapon sa maong mga basketball ring daghang batan-on usab nga moduwaay og basketball ang nagyawyaw.

Ang basketball court kaniadto diha sa Barangay Poblacion ang gi-convert ngadto sa tennis court human nga ang tennis court gitukoran kini og laing building sa Talisay City College.

Sa pagsugod sa maong proyekto giingong wala masayod niini ang opisyales sa Barangay Poblacion.

Samtang si Kongresista Gerald Anthony “Samsam” Gullas, Jr. nagkanayon nga sa sunod nga adunay proyekto ang siyudad kinahanglan masayod ang opisyales sa barangay tungod kay sila man ang unang pangutan-on sa mga konstituwente diha sa ilang lugar.

Matud ni Gullas nga buot niyang masulbad ang maong isyu sanglit giingong lakip siya ang walay kalibutan niini. (BANAT NEWS)