Dugang benepisyo sa mga Solo Parents
![Dugang benepisyo sa mga Solo Parents](https://media.philstar.com/photos/2019/04/14/solo-parent_2019-04-14_12-56-38.jpg)
CEBU, Philippines — Hayan mahatagan og 10 porsyento nga diskwento ang mga Solo Parents sa Dakbayan sa Sugbo sa ilang mapalit nga pagkaon matag una ug katapusang Domingo matag bulan.
Mahitabo kini kon mapalabang na sa konseho sa dakbayan ang balaudnon nga gitinguha ni Konsehal Eduardo Rama Jr.
Sumala ni Rama nga daghang Solo Parents naglisod og buhi sa ilang pamilya ug dakung tabang na kanila ang makuha nga diskwento gikan sa restaurants, canteens, cafes, fast food restaurants ug sa mga susamang tindahan sa mga malls sa siyudad.
Kinahanglan lang nga morehistro ang mga Solo Parents sa Department of Social Welfare and Services aron sila mahatagan og identification card (ID).
“Solo parents shall be entitled to a ten percent discount for meals purchased by a solo parent with his or her children for the first and last Sunday of each month. The discount shall be on the total bill of each month,” matud sa giduso nga ordinansa.
Sa kasamtangang ordinansa, ang kagamhanan naghatag og P5,000 nga financial assistance sa mga Solo Parents nga adunay P60,000 nga annual income ubos sa Republic Act 8972 o ang Solo Parents Welfare Act of 2000.
Kon maaprobuhan ang ordinansa ni Rama, ang mga business establishments nga mohatag og discount sa mga Solo Parents, mamahimong maka-claim og tax deduction gikan sa siyudad.
Ang maong giduso nga ordinansa gisusi karon sa Committe on Laws, Ordinances, and Styling sa konseho una pa kini ipaubos og public hearing ug final deliberation. (/DILT)(BANATNEWS)
- Latest