May duha ka ‘persons of interest’

CEBU, Philippines — Aduna nay gisundang “persons of interest” ang kapolisan sa pagpamusil sa The Good Cup Coffee Company nga nikalas og duha ug niangol og laing duha diha sa dalan F. Ramos sa Barangay Cogon-Ramos ning Dakbayan sa Sugbo tulo ka adlaw na ang nakalabay.

Gitug-an sa hepe sa Abellana Police Station nga si Police Major Eduard Sanchez nga aduna na silay gisubay nga duha ka mga person of interest (POI) apan wala gibutyag kun kinsa ug unsa ilang partisipasyon sa krimen.

Wala usab giklaro ni Sanchez kun unsa nga anggulo ang ilang gitan-aw sa pagtumbok sa POIs sanglit ila na kining gi-monitor ug gilikayan nila nga makamatikod na kini.

Apan gibutyag ni Sanchez nga ang duha ka mga POIs mao ang gituohang utok sa krimen.

"Mao na atong tan-awon either nangunay sila og pusil or nang-hire sila," sigun niini.

Dugang sa hepe nga ilang imbestigaran ang mga tawo nga magsige og pangutana ngadto sa front desk sa tambalanan kabahin sa duha ka mga  survivors.

"Apil sad na sa investigation namo kung kinsa ni sila nganong magsige man kuno og pangutana," matud sa maong hepe.

Sa pagkakaron, nagbutang na og 24 oras nga security ang kapolisan sa tambalanang gikahimutangan sa mga survivors nga posibleng mamahimo nilang testigo batok sa mga mamumuno.

Niadtong Abril 10, Miyerkules sa gabii, gisulong sa usa ka gunman ang paingon na unta mamauli nga mga barista sa maong kapihan ug gipusil ang usa sa mga tag-iya nga si John Michael Hermoso. Dead on the spot si Hermoso ug dead on arrival  sa tambalanan ang usa sa mga barista niini nga si Kis Ramos.

Samtang nangasamdan ang lain pang duha ka barista nga nagpaalim karon sa tambalanan.

Nakuha sa Closed Circuit Television ang nag-inusarang gunman nga walhon ang kamot ug diretsong namusil sa mga biktima. Ug pagkahuman nisakay kini og motorsiklo nga gimaneho sa laing tawo ug nisibat padung sa dalan F.Ranudo. (/IBM)(BANATNEWS)