Mabdos nibugaw sa mga igsuon ug sa 6-anyos nga anak
CEBU, Philippines – Usa ka 22-anyos nga mabdos ug inahan niini ang nasikop human giingong giunay og bugaw diha sa online ang kaugalingong anak ug mga igsuon niini nga babaye.
Ang maong insidente nahitabo diha sa usa sa mga barangay sa Dakbayan sa Sugbo niadtong Miyerkules sa hapon.
Ang maong mabdos giingong maoy nibugaw sa iyang 6-anyos nga anak ug sa mga igsuon niini nga nagpangedaron og 18 ug 21-anyos diha sa online. Samtang ang 43-anyos nga inahan niini gilakip og sikop tungod kay giingong mao kini ang mokuha sa gipadala nga kwarta.
Nangulo sa maong operasyon ang Women and Children Protection Center-Visayas Field Unit diin na-rekober nila ang mobile phones ug money transfer receipts.
Matud ni Atty. John Tanagho, director sa International Justice Mission (IJM)-Cebu field office nga tibuok nasud ang mga online trafficker gipangsikop kini ug gipasakaan og nonbailable offenses nga naglangkub sa human trafficking kauban ang cybercrimes ug pag-produced og child pornography hinungdan nga mapasalamaton siya sa kapolisan nga nagtutok sa imbestigasyon ug mga operasyon.
Matud usab ni Tanagho nga ang Inter-Agency Council Against Trafficking-7, Women and Protection Desk, Special Weapons and Tactics sa Cebu City Police Office, Department of Social Welfare and Development-7 ug IJM ang nagtinabangay.
Ang pagkasikop sa mga suspetsado kini tungod sa advance investigative workshop diin ang outcome gisuportahan sa Philippine and Foreign Law Enforcement Collaborative Efforts batok sa online sexual exploitation sa kabataan. (/BDB)(BANAT NEWS)
- Latest
