Gwardiyang suspek sa padayong gipangita

CEBU, Philippines – Ang Danao City Police nakakuha na og lig-ong ebidensya batok sa gwardiya ug suspek sa pagpatay sa 14-anyos nga si Thesa Marie Ygay nga si Jessie Mediquillo.

Sigon pa sa imbestigador nga si Police Senior Master Sergeant Marlon Remollo nga nakakuha nila sa crime scene ang jacket nga gituohang gipanag-iya sa suspek. Giingong anaa kini pat-ak sa dugo maong ilang gisumiter sa crime lab aron susihon kon kang Thesa ba kini.

Ang maong jacket nakita sa CCTV footage nga gisul-ob sa suspek dihang migikan kini sa tunghaan dihang kini mipauli mga alas 7 sa buntag niadtong Sabado. Imbes nga alas 9 pa sa buntag ang relibo niini, giingong gibiyaan ni Mediquillo ang iyang poste aron adtuon sa balay ang iyang karelibo.

Gibutyag usab ni Remollo nga aduna silay nakuha nga mga saksi nga nakakita ni Mediquillo nga mibalik sa tunghaan sa wala pa makaplagi ang lawas ni Thesa.

Basi sa resulta sa gipahigayong autopsy sa medico legal sa PNP Crime Laboratory-7 nga si Dr. Benjamin Lara, nakaangkon og 23 ka samad dinunggaban ug 12 ka tinigbasan si Thesa nga maoy gituohang hinungdan sa kamatayon niini.

Daku ang pagtuo ni Danao City Police Station chief PLt. Col. Maribelle Getigan nga wala pa makasibat sa Sugbo ang suspek ug nakig-alayon na sila sa ubang mga estasyonan. (/DILT)(BANAT NEWS)