Naglisod og tangtang sa illegal posters

CEBU, Philippines — Atol sa pagsugod sa dungan nga pagtangtang  sa mga illegal campaign posters nga gilusad sa Commission on Elections (Comelec) uban ang nagkadaiyang ahensiya niadtong Lunes, nakasinati sila og kalisdanan sa maong tahas. Unang nagtapok ang mga personnel sa DPWH, PNP ug ubang mga ahensiya atubangan sa buhatan sa Comelec-Cebu City diin una nilang girumbo ang Brgy. Pahina Central diin halos tanang palibot sa maong lugar, natabunan og mga campaign posters. Kasagaran niini gipamutang sa dili designated area.

Gumikan niini, nakasinati og kalisod ang ubang nanangtang kay dili sayon ang pagkuha sa mga posters tungod sa kapilit ug gikinahanglan pa kining gamitan og kiskis aron hingpit nga malaksi.

Lakip usab sa gipangbaklas ang mga dagku nga poster nga gipangbitay sa gymnasium.

Sumala pa ni Atty. Marchel Sarno, election officer sa South District nga wala silay pili basta ilegal nga gipamilit,  tangtangon gyud kini.

Una nang gipahibalo sa Comelec nga tangtangon ang mga campaign posters nga gipahimutang bisan asa lang human magsugod ang local campaign niadtong Marso 29.

Si Police Col. Manuel Abrugena, director sa Cebu Provincial Police Office, mibutyag nga ang papel sa kapolisan mao ra ang paghatag og proteksyon sa mga nanangtang og posters ug dili sila moapil sa pagpanangtang. (/DILT)(BANATNEWS)