Adto na motubag sa korte

CEBU, Philippines — Sa korte na tubagon sa mga kadagkuan sa Cebu Provincial Police Office ang pagkwestiyon sa kampo sa mga Arquillano sa legalidad sa pag-aresto kanila.

Niadtong Domingo, ang mga abogado nila ni San Francisco Mayor Aly Arquillano ug Bise Mayor Alfredo “Al” Arquilano Jr., miingon nga adunay sipyat ang search warrant nga giluwatan ni Judge Leopoldo Cañete sa Regional Trial Court Branch 59 sa Barili maong plano nila nga mosang-at og motion to quash sa Danao City RTC

Unang argumento nila mao nga dili hurisdiksyon sa RTC Barili ang San Francisco ug giingong balido lang ang warrant niadtong Abril 2, apan ang raid nahimo pagka Abril 4 na.

Nunot niini, sumala sa direktor sa CPPO nga si Police Colonel Manuel Javier Abrugena, nga adto ra sila motubag sa korte.

Nangatarungan ang kolonel nga lehitimo ang ilang operasyon ug gihimakak niya nga milapas ang mga operatiba sa tawhanong katungod sa mga Arquillano.

Gihimakak usab niini ang alegasyon nga nananom og mga ebidensiya ang kapolisan maong adunay granada nga napalgan sa panimalay sa mga Arquillano.

Dugang pa niini, nga legal sab ang ilang pagkuha og search warrant gikan sa Barili RTC  bisan pa man og dili niini hurisdiksyon ang  San Francisco, Camotes Islands.

Dugang sa direktor nga wala nasagulan og politika ang maong operasyon, sanglit nagbasi ra sila sa ilang nakuhang impormasyon diin nagtumbok sa duha nga giingong adunay mga armas nga posibleng magamit karong panahon sa eleksyon.

Wala hinuon gikonpirmar ni Arbugena nga adunay mga goons ang mga Arquillano. (/DILT)(BANATNEWS)