Gasa para sa akong pinanggang magtutudlo (Part 2)

CEBU, Philippines — Wala ko magtuong duna diay koy maligsang mga dagkong tawo tungod sa akong giduso nga balaod nga makatabang sa mga magtutudlo sa pangpublikong mga eskuylahan.

Apan bisan pa man niini, wala nako giatras ang House Bill 2542. Sama sa tinuod nga Visayanian nga mogawas ang kamaayong makigsangka kun naa na sa kalisdanan, akong gitutokan ang akong balaudnon aron kini makapasar sa Ubos Balay Balauranan. Ang mga inila nakong mga amigo, mga politiko nangutana nako kun unsay akong makuha sa pagpas-an aning balaura.

 “Why the fervor behind the bill? What’s in it for you? Nothing-except the desire to render service, which I had sworn to  as a public servant,” nakasabot ko nganong ilaha akong gipangutana ani, dili nila gustong mapakyas lang ko.

Apan inay nga motalaw, nisamot kadako ang akong paningkamot nga mapasar kini. Niduol sa mga kaubanang kongresista ug mga senador, kadaghan kanila kutob ra diay sa estorya. Mura ko og nag-inusara sa kalasangan.

Apan ang akong paninguha nagbunga niadtong Oktubre 23, 2002, giaprubahan sa Kongreso ang House Bill 2542. Kay bagito pa lagi ko sa pagka-kongresista, grabe kadako ang gibati nakong kalipay sa akong nahimo.

Apan daghan pang angay buhaton, kinahanglan pa kining maaprubahan sab sa Senado.

Tungod niini, nihangyo ko sa tanang DECS regional directors  ug uban pa nilang mga opisyales sa mga pangpublikong tunghaan nga tabangan ko pag-awhag sa Senado nga ipasar ang maong balaudnon.

Among giduol si kaniadto Majority Floor Leader Senator Loren Legarda kinsa nipadayag og suporta sa akong tinguha.

Giduol sab namo si Senador Franklin Drilon,  apan mura man og bugnaw kaayo ang iyang pagtagad kay daw dili siya interesado ug wala ko kasabot ngano. Tungod sa kakusog sa supak, natanggong og usa ka tuig ang akong balaudnon diha sa Senado. Pwerte nakong guola, apan sama sa ako nang kinaiya, nidangop pa sa pag-ampo.

Nakahinumdom ko sa usa ka estorya sa Gospel ni San Lucas, bahin kadto sa usa ka huwes nga wala gikahadlokan bisan Ginoo.  Usa ka biyuda ang niduol sa maong huwes aron makaangkon og patas nga hukom sa iyang kaso.

Sud sa daghang mga adlaw nga paghangyo, sa kataposan ang huwes mipagawas sa iyang hukom sa kaso tungod kay nabalaka kining basin og masuko ang biyudo tungod sa desperasyon ug makabuhat na hinuon og dili maayo kaniya pinaagi sa pagbawos.

Ang maong estorya sa gospel nasulod gyud sa akong hunahuna. Miduaw dayon ko ni DECS Secretary Edilberto de Jesus. Kaila gyud mi ni Secretary de Jesus kay siya may kanhi presidente sa Far Eastern University. Direkta ug mubo ra kaayo ang akong pakig-estorya kaniya bahin sa akong balaudnon.

Samtang nagpaabot ako nga mapasar ang akong balaudnon, nakadawat gyud ko og tawag gikan ni Secretary de Jesus. Iyaha akong gisultihan nga iyang gimandoan ang iyang Undersecretary nga si  Miguel Luz nga i-implementar ang pagtukod og regional payroll service units sa mga piniling mga lugar sa nasud. Mura ko og naglutaw sa kalangitan niana dayong taknaa. 

Dako kaayo ang akong kalipay. Nakahinumdom ko sa estorya ni Papa Inting nga:“If you have noble intentions, the Lord will always answer your prayers.”

Mismo si Presidente Gloria Macapagal Arroyo nitambong gyud sa labing unang pagsubo sa regional payroll office sa DECS-Cebu niadtong Hunyo 22, 2004. Siya mismo ang nitunol sa labing unang mga tseke alang sa mga magtutudlo sa mga publikong tunghaan gikan sa Talisay City. Ang maong mga magtutudlo dako kaayo ang kalipay nga nahimo silang inisyal nga benepisaryo sa House Bill 2542.

Si Mama Pining miingon kaniadto: “Gratefulness springs from the memory of the heart.” Mao nga naglagubo akong dughan sa tumang kalipay ug dakong pasalamat sa mga tawong nakasabot sa akong misyon nga mahimo nang kubrahon sa mga public school teachers ug non-teaching employees ang ilang sweldo dinhi lang sa ilang rehiyon.

Dili nako makalimtan kadtong mga tawo nitabang aron matinuod ang gitawag nakong “impossible dream.”

Dako kaayo ang akong pasalamat nilang Presidente Arroyo, Secretary de Jesus, ug Undersecretary  Luz. Samang pasalamat sab ang akong gipaabot ngadto sa akong mga kaubanan sa 12th Congress nga nitabang kanako sa maong balaudnon nga sila si Congressmen Meling Espinosa, Nonoy Andaya, Chiz Escudero ug Congresswoman Nerissa Soon-Ruiz.

Nakompleto ang pagtukod og regional payroll offices sa tibuok nasud niadtong Hunyo 2006.

Ang mga public school teachers ug uban pang DepEd personnel sa tibuok nasud gawas lamang sa Region IV, ARMM, ug NCR makakobra na sa ilang sweldo, makapa-korihir sa sayop nga kwentada sa ilang mga suholan diha nalang sa regional offices sa DepEd.

Daw naibtan og tunok ang mga public school teachers kay di na kinahanglang mobiyahe pa sila sa Manila kun may mga reklamo sa ilang sweldo.