16 ka kandidata mag-indigay sa Miss Mandaue

CEBU, Philippines —  Nikabat ngadto sa 16 ka maanyag nga dalaga ang mag-indigay sa ipahigayong Miss Mandaue Karong Mayo 7, 2019 atol sa besperas sa kapistahan sa siyudad.

Ang Dakbayan sa Mandaue magsaulog sa kapistahan sa ilang patron nga si Senyor San Jose karong Mayo 8.

Si Atty. Regal  Oliva, pangulo sa screening committee  nibutyag nga higpit ang ilang paghashas  sa mahimong opisyal nga kandidata  sa Miss Mandue  karong tuiga diin dili lang sa kanyag ang ilang gibasehan niini.

Matud ni Oliva nga naglakip sa ilang gibasehan mao ang gihuptan nga talento ug ingon man ang gitas-on sa pamarog nga dili moubos sa 5’ 4’ ang gitas-on.

Naglangkub sa mga opisyal nga kandidata mao ang nagpanuigon gikan sa 17-anyos ngadto sa 25 -anyos nga naglakip kanila ni Lorraine Hann, Kristine Gillamac, Rhean Caruana, R-Jane Lugod, Angel Me Dacay, Rica Mae  Pitogo, Lorraine Mitzi Ambrad,  Aueleth Borja, Cristine Rudolph, Umayma Alrawahi, Julienne  Dabon, Charlotte Stuck. Jesselle Saniel, Angeli Navarro, Karla  Lasquite ug Amanda  Basnillo.

Dugang ni Oliva nga naglakip sa ganti nga madawat  sa mamahimong hara sa dakbayan karong tuiga mao ang P100,000  nga salapi ug usa ka tuig nga scholarship  sa iyang pagtungha sa bisan asa nga dagkong unibersidad, ang 1st  runner up makadawat usab og ganti nga P50,000 ug 75 porsiyento nga scholarship sa iyang pagtungha ug P30,000 usab ang second runner up ug P20,000 usab ang madawat sa mahimo nga 3rd runner up.  BDB (BANATNEWS)