CADAC subling magtagbo
CEBU, Philippines — Ang Cebu City Police Office nanawagan sa lokal nga kagamahanan sa Siyudad sa Sugbo ug sa business sector nga mohimo og programa alang sa mga drug users.
Si CCPO director Police Colonel Royina Garma nagkanayon mga walay pulos ang ilang pagdakop sa mga distributor sa drugas sa dakbayan kon taas gihapon ang demand sa illegal drugs. “N’ong nag-usap kami with (my) officers, bakit it keeps on coming in despite of millions na nahuhuli namin, nakita namin ang market andyan pa ang daming users,” tug-an ni Garma.
Gibutyag usab niini nga kinahanglang dasigon ang mga drug user nga mopaubos og drug rehabilitation diin dinhi na mosulod ang responsibilidad sa lokal nga kagamhanan. “Ang problema, walang effort na ganun. Kung meron man, eh kulang,” sigon sa city director. Dugang sa maong colonel nga kausa ra gani sila naka-meeting kauban ang mga sakop sa City Anti-Drug Abuse Council (CADAC) sukad niadtong milingkod siya pagka city director niadtong Hulyo 1, 2018. Nunot niini, si Garry Lao, ang pangulo sa Cebu City Office for Substance Abuse Prevention (COSAP) ug co-chairman sa CADAC midepensa ug nagkanayo nga aktibo gihapon ang ilang community-based rehabilitation program, ang We Care Program.
Nasayran nga ang maong programa nahimo dungan sa pagsugod sa Oplan Tukhang niadtong tuig 2016 diin i-enroll ang mga nalistang mga durigista sa mga kabarangayan ug kadtong boluntaryong mitahan sa ilang kaugalingon.
Dugang ni Lao nga quarterly ang ilang meeting ug wala sila nakatagbo og balik niadtong Enero alang sa first quarter sanglit na-busy ang tanan sa preparasyon sa Sinulog.
“I called up colonel Garma and I thank her for reminding me for the meeting,” si Lao nagkanayon.
“Wala nakalimtan. It’s just that pag Jjanuary man gud, lisod nato i-convene because of Sinulog preparation,” dugang ni Lao. Matud pa nga karong adlawa ipanghatag ni Lao ang mga formal communication ngadto sa mga sakop sa CADAC aron hisgutan ang first quarter. Mahitabo ang maong panagtagbo karong Abril 8.
“We will talk about the problems, the situation, apil na didto i-discuss ang community- based rehabilitation program, kadtong mga concerns sa mga members,” si Lao miingon. Dugang ni Lao nga lakip sa ilang hisgutan mao ang plano nga programa sa Philippine Drug Enforcement Agency-7 diin target niini ang mga business sector aron makab-ot ang gitinguhang ‘drug free workplace’. (/DILT)(BANATNEWS)
- Latest
