Campaign posters sa designated areas ra gyud-Comelec

CEBU, Philippines – Subling gipahinum-doman sa buhatan sa Commission on Elections (Comelec) ang mga kandidato sa May 13 midterm elections sa pagsunod gyud sa mga lagda bahin sa gidak-on ug kun asa nila gipamilit ilang campaign materials sa pangpublikong mga dapit.

Kini aron dili sila mag-atubang og disqualification case pananglitan moreklamo ang ilang mga kaatbang tungod sa wala nila pagsunod sa mga lagda sa Omnibus Election Code.

Si  Jackey  Reuyan  nga  maoy  assistant Comelec  Officer   sa Dakbayan  sa Mandaue  nga nahinabi  sa Banat  News  miingon nga kinahanglang sa mga common poster  areas lamang gyud magbutang og campaign materials.

Ang mga common poster areas naglakip sa mga barangay halls, public markets ug sa mga barangay covered courts sama sa Mandaue  City  Sports and  Cultural  Complex  sa  Sitio  Tribunal sa  Barangay  Centro sa maong dakbayan.

Matud  pa ni Reuyan nga gidili ang pagbitay  o  paglansang og campaign posters sa punoan sa kahoy, mga poste  ug ingon man sa mga wire sa kuryente nga makaingon na unya sa sunog.

Hinuon mahimong makabutang niini sa mga pribadong mga panimalay kun may pagtugot sa tagbalay o pribadong luna.

Sa pikas bahin, namatikdan kining mga bato sa daplin sa kadalanan sa mga kalungsoran ug pipila ka dapit sa Metro Cebu nga gipintalan og puti nga adunay nakasuwat nga numero 24.

Giingong ang maong mga bato nga gipintalan pamaagi sab sa kampanya sa kandidato nga si kanhi PNP Chief Ronald “Bato” Dela Rosa.

Si Reuyan dihang gikuhaan sa Banat News og komento bahin niini, siya nagkanayon nga walay kalapasan sa lagda ang gihimo sa kandidato nga nagpintal og numero diha sa mga  bato o  bisan ang pagpintal  sa pangalan sa mga kandidato basta dili kini makahugaw tan-awon sa palibot.

Sa laing bahin, bag-o na ang supervisor sa Comelec sa Siyudad sa Talisay tungod sa gipatumang lahugay sa maong ahensya sa lalawigan sa Sugbo.

Si Atty. Gallardo Escobar gibalhin na sa Dakbayan sa Toledo samtang si Atty. Charisse Faith Sojor nga gikan sa Siyudad sa Naga mao na ang nihulip ni Escobar sa Talisay.

Sama sa pahimangno ni Reuyan, si Sojor miingon nga kinahanglang sundon sa mga kandidato ang mga lagda kun asa ra gyud sila mahimong makapapilit og campaign posters.

Matud niya kun duna silay masakpan nga nakalapas niini, padad-an nila og notisya ang kampo sa mga kandidatong gahi og ulo aron boluntaryo kining tangtangon. Kun dili sila mosanong pugsanon kining panangtangon sa Comelec.

Ang hustong sukod sa posters sa indibidwal mao ang 2x3 apan kadtong gamiton sa rally mahimong 3x8 ang sukod apan ipatangtang kini dayon human sa kalihokan. (Gabriel Bonjoc/IBM)(BANAT NEWS)