Wala mosubay nga poster ipatangtang

CEBU, Philippines – Usa ka adlaw sa dili pa magsugod ang local campaign period alang sa mga lokal nga kandidato sa umaabot nga midterm election sa Mayo 13, ang Commission on Elections (Comelec) subling mipahimangno sa mga kandidato nga sugdan na ang pagtangtang sa ilang mga campaign poster nga wala mosunod sa guidelines sa Comelec.  Ang local campaign period sa mga lokal nga kandidato magsugod ugma, Marso 29.  Si Atty. Jerome Brillantes ang acting provincial election supervisor sa Probinsiya sa Sugbo nagkanayon nga kon moabot ang 72 ka oras nga wala pa matangtang ang maong mga campaign posters nga lapas sa guidelines sa Comelec, ang mga personnel na sa komisyon maoy motangtang niini.

Ang mga mag magahi, mahimo nga maka-commit og election offense.

Sa guidelines sa Comelec ang mga pamphlets, leaflets, cards, decals, stickers, o uban printed nga materyales kinahanglan adunay sukod nga dili molapas og 8 ½ inches ang gilapdon ug 14 ka pulgadas.

Ang mga posters nga gamit sa panapton, papel, cardboard o bisan unsa nga materyales nga giframe o ipost lang diretso, dili dapat molapas og 2x3 feet. Samtang ang mga streamers, dili angay usab molapas og 3x8 feet ang sukod atol sa mga public meeting o rally. 

Gidili usab ipamilit ang mga campaign posters sa mga public areas sama sa mga kakahoyan, poste sa suga, waiting sheds, sidewalks, traffic signs, barangay halls, health centers, public shrines, public transport terminals, taytayan, pantalan, tugpahanan, patrol cars, ambulance, center islands ug uban pa. (Romeo T. Limpangog/DILT)(BANAT NEWS)