Noynoy gikampanya ang Otso Diretso

Noynoy gikampanya ang Otso Diretso

Decemay P. Padilla

CEBU, Philippines – Gikampanya ni kanhi Presidente Benigno “Noynoy” Aquino ang mga kandidato sa Otso Diretso kagahapong adlawa sa Siyudad sa Sugbo.

Si Aquino nag-awhag sa mga Sugbuanon sa pagbotar sa kandidato nga sa iyang tan-aw makahatag og maayong serbisyo sa mga Pilipino.

Si Aquino mitambong sa “Manindigan Democracy Forum” inubanan nila ni Chel Diokno, Samira Gutoc, Erin Tañada, Romy Macalintal ug Pilo Hilbay nga gipahigayon sa Southwestern University-PHINMA.

Mga estudyante sa maong tunghaan ang nanambong sa maong tigum.

Kagahapon sa buntag, ang mga naasoy nag senatorial candidates, mibisita sa Carbon Public Market, Tabunok Public Market ug Carcar Public Market. (Mitchelle L. Palaubsanon/DILT)

Disqualification case dili makaapektar sa kandidatura

Gi-serve kagahapon sa Commission on Election Cebu City North District ang disqualification order nga gipagawas sa Comelec First Division batok kang Konsehal Alvin Arcilla. Kahinumduman nga usa ka Allen Canoy ang misang-at og petisyon nga nagtinguha sa ‘Deny Due Course and/or Cancel Certificate of Candidacy ni Arcilla sa rason nga matud pa naka-serbisyo na kini og tulo ka termino.

Nunot niini, ang Comelec First Division mipabor sa gisang-at nga petisyon ug mipagawas og kamanduan nga matud pa si Arcilla “ineligible to run as Member, Sangguniang Panlungsod in the First District of Cebu City having been elected and having served, in the same position for three (3) consecutive terms immediately prior to the 13 May 2019 NLE”.

Una nang giklaro ni Arcilla nga ang iyang serbisyo naputol dihang nasuspenso siya gikan sa Mayo 17, 2016 hangtud sa Hunyo 30, 2016 diin ang suspension gipagawas sa Office of the President niadtong 2016 batok nila ni kanhi Mayor Michael Rama, Vice Mayor Edgardo Labella, 12 ka Konsehal apil na siya tungod sa pag-release sa calamity assistance ngadto sa mga empleyado ug opisyales sa City Hall niadtong 2013. Human nga ma-serve ang disqualification order, si Atty. Marchel Sarno miingon nga magpaabot sila kon ang kampo sa konsehal mosang-at og motion for reconsideration dayon magpaabot sila sa desisyon sa Comelec En Banc kay adto man kini isang-at. Dugang ni Sarno nga dili ra maapektuhan ang kandidatura ni Arcilla sa maong order sanglit dili paman kini executory ug subay niini kandidato lang gihapon sa pagka-konsehal si Arcilla sa umaabot nga piniliay.

Nasayran nga nadawat sa Comelec Cebu City North District ang disqualification order alas 5 sa hapon niadtong Lunes.

Sa iyang bahin, si Atty. Winifredo Orcullo, Legal Counsel ni Arcilla miingon mo-file sila og motion for reconsideration karong Biyernes sa panghinaut nga ang Comelec En Banc mobali sa desisyon sa first division.

Si Atty. Amando Virgil Ligutan, spokesperson ni Arcilla miasoy nga ang konsehal bonafide election bet gihapon sanglit ang desisyon dili paman executory.

Dugang niini nga si Arcilla dili disqualified sanglit ang executory decision gikan sa Comelec mao lang ang maka-deklarar niini. (/DILT)(BANAT NEWS)