Nancy Binay nag-promote sa iyang libro

CEBU, Philippines — Si Senador Nancy Binay mianhi sa Sugbo aron sa pag-promote sa iyang unang libro nga giulohan og “Make Love Not War”.

Giasoy ni Sen. Binay nga makatabang ang maong libro sa mga millennials kon unsaon nila pagdala ang ilang mga relasyon, pag-atubang sa mga pagpanghampak o ‘bashing’ sa online ug tips kon unsaon pagsugakod sa bullying social media bullying.

Ang maong libro namugna pinaagi sa pakig-alayon ni Binay kang Senyora, ang numero uno niyang basher diha sa social media. Ekslusibong mapalit ang libro ni Binay sa National Bookstore ubos sa ABS-CBN Publishing diin anaa na kini sa ika-unom nga pwesto isip bestseller sa maong bookstore tibuok nasud.

“Di bale nang hindi ako Number 1 sa senatorial survey, okay na ako maging Number 1 ‘yong book ko,” matud pa ni Binay.

Si Binay nahimutang sa ika-pito nga pwesto sa mga midagan pagka-senador basi sa bag-ong gipagawas nga survey.

Ang reelectionist nga senadora molusad na usab sa iyang ika-duhang libro nga gipangulohan og “The Charcoal Confessions” inig human sa piniliay. (Mitchelle L. Palaubsanon/DILT)

Death penalty: Ibalik o Dili?

Human sa niluog nga pagpatay kang Christine Lee Silawan, daku ang pagtuo sa mga tigpatuman sa balaud nga panahon na nga ibalik ang death penalty sa nasud.

Mitumaw og balik ang maong isyu didto sa kaulohan ingon man sa social media human sa brutal nga pagpatay kang Silawan. Gipangayo sa Banat News ang opinyon sa pipila ka mga opisyal kabahin niini ug kadaghanan mipadayag sa ilang pag-uyon.

Si PSSupt. Royina Garma, ang direktor sa kapolisan sa Dakbayan sa Sugbo nagkanayon nga ang death penalty makahatag og importansiya sa gipatay o sa biktima. Ang tigpamaba sa Cebu Provincial Police Office nga si PSupt. Eloveo Marquez mipadayag nga sama ra nga nag-amuma og demonyo kon dili patyon ang usa ka tawo nga napamatud-ang guilty sa kaso.

Si Mandaue City Police Office director PSSupt. Julian Entoma nagkanayon nga adunay uban nga bisan og nakumbikto na og kapin 20 ka tuig, inig gawas kriminal lang gihapon og hunahuna.

Apan mipadayag og pagbabag ang tsirman sa Bagong Alyansang Makabayan (BAYAN) Central Visayas nga si Jaime Paglinawan.

Matud niya ang pagbalik sa death penalty, sama sa kampanya sa batok ilegal nga drugs, ang mga kabus lang ang maalaut kay walay katakusa nga makakuha og maayo nga abogado, samtang ang mga adunahan sigurado nga makalingkawas niini. Gisuwayan sa Banat News sa pagkuha sa iyang habig ang direktor Commission on Human Rights-7 nga si Atty. Arvin Odron apan wala pa kini mitubag. (/DILT)(BANATNEWS)