Duha ka kauban nailhan na

CEBU, Philippines — Ang Police Regional Office-7 nibutyag nga nailhan na ang laing duha ka mga kauban sa 17-anyos nga suspek sa pagpatay kang Christine Lee Silawan nga gipatay diha sa Lapu-Lapu City.

Si Chief Supt. Debold Sinas miingon nga dili nila mahimong mapublikar ang mga pangalan tungod nagpadayon pa ang imbestigasyon ug operasyon pagpangita kanila.

Daan nga giklaro ni Sinas nga motabang gihapon sila sa National Bureau of Investigation-7 sa imbestigasyon sa maong kaso bisan og dili sila maoy nakauna og dakop sa gitumbok nga prime suspect.

Samtang giangkon sa director sa NBI - 7 nga ‘circumstantial evidence’ pa lang ang ilang gihuptan batok sa 17-anyos nga batan-ong gitumbok nga maoy nagpatay sa 16 anyos nga si Christine Lee Silawan sa Dakbayan sa Lapu-Lapu.

Matud pa ni Atty. Tomas Enrile padayon karon ang ilang forensic chemist ug cybercrime investigators sa pagpangita pa ug pagsusi sa mga ebidensya nga ilang gihuptan lakip na niini ang sapot, computer ug cellphone sa dinakpan.

Apan iyang giklaro dili lang kini mao ang ilang gisaligan pagpalig-on sa kaso batok sa suspek nga una nang gika-report nga kanhi uyab sa biktima.

Una niini, ang pamilya sa suspek kusganong nihimakak nga nalambigit kini sa maong krimen kay matud pa nagduwa og basketball ang dinakpan atol sa pagpatay kang Silawan.

 “We just don’t rely on the circumstantial evidence, Pati sa testimonial evidence on-going pa rin,” pasabot pang Enrile sa mga tigbalita.

Iyang giinsister nga wa silay lapso pagsikop sa batan-on ug wala sila nakiglumba sa kapolisan pagsulbad sa maong kaso.

“Nagtutulungan po kami. Kung anong ebidensya ang makalap nila … at actually si PNP Regional Director Chief Supt. Debold Sinas, he ordered his subordinates na kung anumang makuha n’yong ebidensya d’yan, i-turnover sa NBI,” matud pang Enrile.

Atol sa usa ka press conference ang abogado sa suspetsado nipasangil nga ilegal ang pagdakop sa NBI sa iyang kliyente. Apan si Enrile miinsister nga legal kadto tungod kay hot pursuit operation kadto ug mahimo gyud kini dakpon bisan walay warrant of arrest.

Sa pagkakaron, gisalig na ni Enrile ang kaso ngadto sa piskalya human nga napasaka na ang kaso ug nanghinaot na lang siya nga dunay mga saksi nga motumaw ug motabang pagsulbad sa maong kaso. Samtang gikwestyon usab ni Enrile ang intensyon sa Public Attorney’s Office sa tinguha niini nga mopahigayon og parallel investigation.

“Ano ba ang mandate ng PAO?” pangutana pang Enrile bahin sa pag-apil ni PAO Chief Persida Acosta sa kaso dihang namahayag kining managlahi ang mga ebidensyang gipanghuptan sa NBI itandi sa kapolisan.

Sa bag-ong kalamboan, si Sinas nibutyag nga nailhan na nila ang mga pangalan sa laing duha ka mga suspek apan dili pa nila ipublikar ang ilang mga pangalan aron dili masunog ang operasyon.

Sumala pa ni Sinas, ang 17 anyos nga gidakop sa NBI-7 makonsiderar na nga hamtong og panghunahuna human kini masusi sa mga social workers sa DSWD nga nakahibalo na kini kun unsay sakto ug kun unsay sayop. (Micole Gerard J. Tizon, Hannah Joy. I Yana ug Hanna D. Tejada /IBM)(BANATNEWS)