Lahugay sa mga election officers

CEBU, Philippines – Epektibo karong Marso 27, ipatuman ang lahugay sa mga election officers sa Commission on Elections-7 kini human ang ilang ulohang buhatan, mipagawas og memorandum labot sa maong katuyuan isip pagpangandam sa National ug Local Elections karong Mayo 13, 2019.

Ang Comelec Manila mipagawas og memorandum niadtong Lunes labot sa reshuffling nga mahitabo sa ilang mga election officers. Ang maong order subay na sa rekomendasyon sa Comelec Provincial Election Supervisor ug sa Regional Director.

Nagkanayon si Atty. Marchel Sarno, election officer sa Comelec Cebu City North District nga ‘effectively immediately’ unta ang reshuffling nga himuon apan gilangay una ang implementasyon sanglit aduna pa silay training sa mga electoral board.

Nunot niini, nasabutan sa director ug sa mga provincial officers nga ang effectivity sa transfer mahitabo karong Marso 27, adlawng Miyerkules.

Subay sa maong lahugay, si Atty. Sarno mabalhin kini sa Cebu City South District isip Election Officer ug ang mopuli niya mao ang election officer sa Siyudad sa Carcar nga si Atty. Chauncey Boholst.

Samtang ang kasamtangang election officer sa Cebu City South District nga si Atty. Edwin Cadungog ibalhin sa Mandaue City diin iyang hulipan si Atty. Anna Fluer Gujilde nga ibalhin sa Naga City. (/DILT)(BANAT NEWS)