54 ka lugar sa CV ipaubos sa EWAs

CEBU, Philippines – Miabot sa 54 ka mga lugar sa Central Visayas ang nalakip sa Election Watchlist Area sa kapolisan basi sa labing uwahi nga development assessment.

Ang maong update, gipahibawo ni Police Chief Inspector Dominic Poblete, ang chief Regional Tactical Operations Office-7.

Matud ni Poblete ang 54 ka mga lugar sa Tunga-tungang Kabisay-an, gilangkuban sa 20 ka mga lugar sa Sugbo, 24 sa Bohol, ug 10 sa Negros Oriental.

Dugang niini nga aduna silay gi-monitor nga dapit sa NegOr nga gitawag nila og red category tungod sa insurgency, hinungdan nga padayon ang ilang gihimo nga military ug police operations sa lugar aron walay mahimo nga bisan unsa nga ilegal nga mga kalihukan ang mga walhon nga pundok.

Gitug-an ni Poblete nga ang tanang tropa sa military ug regional mobile forces sa kapolisan, naka pokus karon sa lugar aron mabalik ang kalinaw niini. Kini miawhag sa katawhan nga mahimong responsable ug dili lang kutob sa concerned citizens, aron mapadayon ang kahapsay ug kalinaw panahon sa bugnong lugaynon.

Samtang si Atty. Veronico Petalcorin, ang assistant regional director sa Comelec-7, miawhag sa mga bentahoso nga politiko kay bisan ug wala pa ang campaign period, dagku na kaayog mga tarpaulin nga gipangmontar sa mga dili campaign poster area, sa pagpanguha nalang niini daan sa dili pa ang local campaign period kay sigurado nga ila kining pangsakmiton.

Gitug-an ni Petalcorin nga mas maayong tangtangon nalang sa mga politiko ang ilang mga tarpaulin aron ila pa kining mapahimuslan kay kon sila ang makasakmit, sigurado nga kini mangagisi. (/DILT)(BANAT NEWS)