Pagpanghatag og libreng dashcams ipaagi og MOA
CEBU, Philippines — Ang tanang kwalipikado nga public utility jeepney (PUJ) drivers sa libreng dashboard cameras, papirmahon og Memorandum of Agreement (MOA) tali sa kagamhanan sa Siyudad sa Sugbo.
Si Cebu City Transportation Office operations chief Francisco Ouano miingon nga ang executive department mohimo sa maong MOA aron madokumento ang pagpanghatag og dashboard cameras ngadto sa usa ka libo ka PUJ drivers.
“Ato nang himoan og MOA kay kana siya totally free na gihatag sa siyudad. Ilaha ning ampingan kay for the safety ni sa pasahero and drivers,” asoy ni Ouano.
Gilauman nga i-deliver sa supplier ang 1,000 ka units sa dashboard cameras karong umaabot Abril.
Kahinumduman nga si Mayor Tomas Osmeña nakahukom nga mopalit og dashboard cameras aron makuhoran ang kriminalidad ug mapalambo pa ang kahapsay ug kalinaw sa siyudad.
Ang budget sa pagpalit sa dashcams gikan sa approved supplemental budget-5 niadtong miaging tuig nga miabot og P5 milyones.
Sa higayon nga mahatag na ang maong mga dashcams, monitoron sa CCTO ang mga drivers aron masuta nga nagamit gyud kini sa tarong.
Sa tala sa CCTO, anaa palang sa kapin 600 ka PUJs ang nahatagab nila og line certificate nga ilang gisugdan niadtong Marso 6
Nunot niini, giawhag ni Ouano kadtong wala pa makahatag sa ilang gipangayo nga resikitos.
“Atong pasabton ang PUJ operators nga kana siya, it’s for free. Isa sa purpose sa mayor, nakita niya nga daghan crimes, labi na sa gabii. Maayo ni kay naa sila’y dash cams para pagsuta sa mga bati nga element,” matud ni Ouano.
Dugang niya nga ang mga PUJ operators nga dili taga siyudad, mahimo rang makapangayo sa libreng dashcams basta lang makahatag sila og travel line certificate gikan sa CCTO.
Apan prayoridad gihapon sa CCTO kadtong mga jeep nga nagbiyahe sa kadalanan sa dakbayan. (gikan sa The FREEMAN/DILT)
- Latest
