Tracker team nangitang Peter Lim

CEBU, Philippines — Usa ka tracker team sa Philippine National Police ang gipalihok aron pangitaon ang negosyante ug gikatahapang drug lord nga si Peter Lim.

Gibutyag sa direktor sa Police Regional Office-7 Chief Supt. Debold Sinas nga ang maong team hiniusang pwersa sa PRO-7 ug sa National Police Headquarters.

"We have established trackers for Peter Lim and it is a joint operation with the NHQ. I could not reveal kung asa siya but the trackers are active," matud sa maong direktor atol sa press conference.

Apan tak-om ang   direktor kun anaa pa ba sa Pilipinas si Lim sanglit base sa report sa kaulohan aduna usab kini mga balay sa Hong Kong, Canada ug Bahamas.

"No comment I could not tell you because the case is active basin ma reprimand ko ni Chief PNP," sigun ni Sinas.

Tak-om sab kini kabahin sa bahad ni Presidente Rodrigo Duterte nga patyon niya si Lim ug andam siyang mapriso niini.

Ang maong bahad gihimo sa pangulo atol sa campaign rally sa Partido Demokratiko Pilipino-Lakas ng Bayan didto sa Negros Occidental niadtong Marso 8.

Nasayran nga nigawas na ang warrant of arrest batok ni Lim sa kaso niini sa ilegal nga drugas niadtong 2018 nga pinirmahan ni Judge Gina Bibat-Palamos, sa the Regional Trial Court Branch 65 sa Makati City. Gihatagan og gibug-aton sa Department of Justice ang gisaysay sa nangangkong drug dealer nga si Kerwin Espinosa ngadto sa Senate hearing.

Gitudlo niini nga si Lim maoy iyang tinubdan sa drugas nga gipamaligya. Niadtong Agosto 20, 2018 gihatud sa Cebu City Police Office ang maong warrant sa mga balay ni Lim  sa 12 Tres Borces Extension, Barangay Kasambagan ug sa dalan Robin, Sto. Niño Village, Banilad, Dakbayan sa Sugbo, apan wala kini didto. Ang Bureau of Immigration daan nang mipahibalo nga wala sila naka-monitor nga nakagawas sa nasud si Lim. (/IBM)(BANATNEWS)