Drums ug mga kanding ipanghatag

CEBU, Philippines – Nagkanayon si Cebu City Agriculture Department head Apple Tribunalo nga karong adlawa mang-apud-apod sila og 430 ka drums diin dungan nila kining himuon sa Brgy. Bonbon sa South District ug Brgy. Taptap sa North District.

Dugang ni Tribunalo, ang maong mga drums ihatag ngadto sa mga mag-uuma gikan sa 28 ka upland barangays sa siyudad ug inisyal pa lang kini.

Ihatag usab nila ang hauling trucks ug mahitabo sab ang paglusad sa pagpanghatag ug upgrading sa mga kanding diin 50 ka native goats ug lima ka hybrid goats ang ilang iapud-apod.

Gihulagway ni Tribunalo nga daku og tabang ang mga drums ilabi na nga nakasinati og grabeng kainit sa panahon karon.

“… this will serve as their storage container para ma-manage nila effectively ang limited water sources… this would be great help gyud sa ilaha”, asoy ni Tribunalo.

Sa pagpili og beneficiary si Tribunalo miingon nga aduna silay gitagana alang sa barangay ug sa asosasyon apan ilang hatagan gyud kadtong adunay uma ug wala makadawat og drums.

Gipasalig sab niini nga aduna pay umaabot nga pagpanghatag alang sa mga mag-uuma sa umaabot nga mga adlaw. (/DILT)(BANAT NEWS)