Dalagita gikuhaan usab og ubol-ubol ug dila

CEBU, Philippines – Autopsy gitangtangan usab og ubol-ubol ug dila ang 16-anyos nga napalgang patay sa bakanteng luna diha sa Barangay Bankal, Dakbayan sa Lapu-lapu. Si Doctor Benjamin Lara, medico legal officer sa Philippine National Police Crime Laboratory nagkanayon nga natahap siya nga aduna nay kasinatian ang nibuhat sa krimen sanglit paspas ug limpiyo ang agi niini.

“Napakamarunong, sobrang linis, walang natira sa side ng head, I don’t see paano niya nagawa ng mabilis yun, kami nga na nag-autopsy it’s difficult to open the head when we conduct our autopsy.”, padayag ni Lara. Niadtong Marso 11, adlaw’ng Lunes, nagkaguliang ang mga residente sa Bankal dihang napalgan ang patay’ng lawas ni Christine Lee Silawan kinsa gipanitan na ang nawong niini. Gibutyag ni Lara nga gawas nga nadala og kapaksit ang dunggan ug ang panit sa ilong niini sa biktima wala na ang ubol-ubol ug ang dila niini. Matud ni Lara nga walay timailhan nga agi og pinaakan sa mananap ang patay’ng lawas.

Ang biktima giingong nakaangkon kini og 30 ka samad dinunggaban usa sa liog, 20 sa nagkadaiyang parte sa lawas ug siyam sa iyang mga bukton. Giingong  kalima natusak-tusak ang wala nga baga niini ug gawas niini nadulot ngadto sa atay sa biktima ang usa sa mga dunggab ug ang samad dinunggaban niini sa liog maoy nakapatay sa biktima.

Sa laing bahin, ang direktor sa Cebu Provincial Police Office (CPPO) Police Senior Superintendent Manuel Javier Abrugena nibutyag nga nikooperar na sila sa Lapu-lapu City Police Office sa imbestigasyon sa maong kaso. Kini kalabutan sa pagpatay ug pagpanit usab sa 60-anyos nga mag-uuma diha sa Dakbayan sa Danao niadtong Enero 11, karong tuiga.

Gibutyag ni Abrugena nga aduna sila’y nadawat nga impormasyon nga human panitan giingong kaunon kini sa mga suspetsado ang ilang nakuha nga parti sa lawas. Apan giingong dako usab ang posibilidad nga mga lango sa drugas ang nibuhat sa maong krimen. Dugang ni Abrugena nga nitabang usab sila og monitor sa mga kriminal kinsa nipatay kang Silawan. (Rowen D. Capistrano/BDB)(BANAT NEWS)