No- contact apprehension hayan ipatuman

CEBU, Philippines — Ang Cebu City Transportation Office nakauyon sa Leotek, ang Taiwan-based nga kompanyang miinstalar sa intelligent traffic system sa dalan sa General Maxilom Avenue corner M. J Cuenco Avenue.

Si Francisco Ouano, CCTO operations chief  misaysay sa Banat News nga ang traffic system sa Leotek nakita nilang maayo.

“Nakita nato nga well and good. Daghan tang nakita nga pamaagi nila like naa’y violators ma-segregate gyud ang motorcycles, cars and trucks,” siya miingon.

Sa miaging semana, mga representante gikan sa Leotek nipresentar sa ilang report sa opisina ni Mayor Tomas Osmeña uban CCTO ug uban pang hingtungdang mga buhatan.

Kahinumduman, ang city government migamit sa serbisyo sa Leotek aron sa pagsulbad sa problema sa trapiko sa siyudad.

Niadtong Disyembre 2018, si Osmeña misulod sa usa ka kasabutan ngadto sa Leotek alang sa pagpatuman sa smart intelligent traffic system ngadto sa General Maxilom Ave. ug M. J Cuenco Ave. nga walay gasto ang dakbayan.

Si Ouano miingon nga tungod sa traffic scheme sa Leotek, epektibo ang non-contact apprehensions. Ang Closed-Circuit Television camera nga gi-instalar awtomatikong moila sa mga sakyanan nga wala nituman sa balaod sa trapiko.

Ang Leotek nag-instalar og CCTV cameras alang sa pagmonitor ug pag-analisar sa mga kahimtang sa trapiko.

“Nakita nato nga very advance human dali maka-detect ang ilahang system, so pagkakaron atong giestoryahan sa mayor nga mo-continue sila,” siya miingon.

Aron sa pagpadayon sa pagsulay sa effectivity, gipalapdan ang coverage sa Leotek sa pagpatuman sa traffic system sa laing duha ka giila intersections.

Kini mao Gen. Chavez St. corner General Maxilom Avenue ug General Maxilom Avenue corner A. Soriano Avenue.

Apan sa dili pa ang Leotek makahimo sa pagpatuman sa smart traffic system sa mga bag-ong giila nga mga dalan kinahanglan silang mosulod og  lain nga kasabutan sa siyudad.

Dugang pa ni Ouano nga ang lig-on nga ang pagpalapad sa serbisyo sa Leotek, gihatag nga libre ngadto sa siyudad.

Si Ouano nangayo og suporta sa publiko alang kasabutan sa Leotek nga makatabang sa pagtubag sa mga makalilisang nga trapiko sa dakbayan.

Uban sa giilang trapik nga mga lugar sama sa P. Del Rosario St., M. J Cuenco Avenue, Barangay Hipodromo, Osmeña Boulevard ug uban pa. (/IBM)(BANATNEWS)