Suspendidong kapitan kasohan pag-usab
CEBU, Philippines — Ang acting barangay captain sa Mambaling sa Siyudad sa Sugbo nga si Anne Marie Vestil Palomo mopasaka og kaso batok sa ilang suspendidong barangay kapitan tungod sa padayong pagpirma sa mga dokumento sa barangay.
Kini samtang iyang giawhag sa mga residente nga adto moduol kaniya kun mokuha og clearances ug ubang importanteng dokumento nga magkinahanglan og pirma sa barangay kapitan ug dili sa suspendidong barangay kapitan nga si Gines Abellana.
Si Palomo namahayag nga nakabantay siya nga si Abellana misupak sa opinyon sa City Legal Office nga dili na kini otorisado mopirma sa mga dokumento ug mga clearances sa barangay tungod sa iyang suspensyon.
“Naa’y sige og papirma, pirma sad siya(Abellana). Unya ibalik sa business permit section, moanhi tawon ang mga negosyante moreklamo. Naa’y uban mosulong sa barangay hall, moingon nga dili madawat na ang iyahang pirma,” tug-an pa ni Palomo sa Banat News.
Si Palomo miingon bisan pa nga ang kadaghanan sa mga residente nahibalo sa suspensiyon ni Abellana may mga residente gihapon nga naglibog sa padayong presensya ni Abellana sa barangay hall.
Niadtong buwan sa Pebrero, ang CLO niisyu og usa ka opinyon base Section 61 (c) of Republic Act No. 7160 or the Local Government Code (LGC) nga nag-ingon: “A complaint against any elective barangay official shall be filed before the Sangguniang Panlungsod or Sangguniang Bayan concerned whose decision shall be final and executory.”
“Sige gihapon siya mopirma, as in every day. Amo gi-file ang gipangbalik. Ang sa akoa sad naa’y diretso ra moari sa akoa, “Palomo miingon.
Matud niini ilang gitigom ang mga dokumentong gipirmahan ni Abellana aron gamitong ebidensya pagpasaka nila og kasong usurpation of authority ug anti-graft and corrupt practices act karong adlaw nga Huwebes.
Duha ka buwan na ang nakalabay dihang gisuspenso si Abellana tungod sa pagpangabuso sa gahom dihang nagdumili kini paghatag sa mga honorarya ni Palomo ug sa ubang tulo ka barangay konsehal sugod Hulyo ngadto sa Disyembre 2018.
Ang laing tulo ka barangay konsehal mao silang Edwil Magsige, Victoriano Laborte ug Neonita Cuestas. (/IBM)(BANATNEWS)
- Latest
