Polis nakigpinusilay sa SPARU i-promote
CEBU, Philippines — Polis nga nag-inusarang nakigbinakbakay sa tulo ka mga sakop sa Special Partisan Unit (SPARU) sa mga rebeldeng New Peoples Army, hatagan og spot promotion sa kadagkoan sa Police Regional Office-7.
Ang direktor sa PRO-7 nga si Chief Supt. Debold Sinas nagkanayon nga hatagan og spot promotion si SPO4 Humprey Wah Teves sa gipakita niini nga kaisog.
Ang spot promotion mao ang diretso nga pagka-promote ug usa ka ranggo sa usa ka polis pinaagi sa gahum sa ilang labaw. Si Teves nadestino sa Finance sa Manjuyod Municipal Police Station.
Base sa report sa kapolisan, niadtong Huwebes sa alas 9:30 sa buntag nakasibilyan nga nangompra sa merkado sa Barangay Bantolinao, Manjuyod, Negros Oriental si Teves dihang gitiunan siya sa upat ka mga armadong lalaki ug gihulga nga pusilon kun dili itahan ang armas niini.
Gibana-bana nga anaa sa 20 anyos ang pangedaron sa maong mga lalaki.
Imbes nga mopatuo, giibot ni Teves iyang armas ug nakigpinusilay sa maong grupo. Usa kontra sa upat ang binakbakay apan, nahuman kini nga walay tatsa si Teves.
Nangaangol ang duha, apan nabiyaan sa lugar ang usa sanglit fatal ang igo niini samtang ang usa sa tiil ra naigo. Dali nga miresponde ang kapolisan sa nahitaboan ug gidala ang naangol ngadto sa tambalanan apan gideklarar kining dead on arrival.
Wala pa mailhi ang maong patay ingun man ang tulo ka mga nakaikyas nga kaubanan niini. Nakuha sa maong patay ang usa ka kalibre .45 nga pistola, cellphone ug uban pang mga personal nga gamit.
Sumala pa sa Armed Forces of the Philippines, mga membro sa SPARU ang upat.
Una nang mipasidaan ang mga kadagkoan sa kapolisan nga patyon gyud sa mga rebelde ang mga polis didto ilabi na kun mag-inusara.
Niadtong Disyembre 19, 2018 sa barangay Poblacion, Guihulngan City gipatay sa nagpailang SPARU ang deputy chief sa Guihulngan Police Station nga si Police Senior Inspector Porferio Gabuya Jr. kinsa nangape ra sa lugar. (/IBM)(BANATNEWS)
- Latest
