Narco Politicians angay nganlan

CEBU, Philippines – Pabor si Konsehal Dave Tumulak sa pagpagawas sa ngalan niadtong mga politiko nga matod pa nalambigit sa illegal drug trade sa dili pa magsugod ang local campaign period.

Si Tumulak nga maoy Chairman sa Committee on Public Order and Safety miingon nga sakto alang sa mga hingtungdang ahensiya nga ipagawas ang ngalan apan kinahanglan nga gipaubos gyud kini og verification.

Sayo niini, ang Philippine National Police miingon ang pagpagawas sa laing listahan sa mga narco politicians magdepende ni Presidente Rodrigo Duterte.

Apan si Interior Secretary Eduardo Año nagplano nga makigkita sa kapulisan ug Philippine Drug Enforcement Agency labot sa pag-ngalan sa mga narco politicians sa dili pa ang campaign period karong Marso 29.

Si Tumulak miasoy sakto nga ang publiko masayod kun kinsa kining mga nalambigit sa illegal activities ug drug personalities aron ang katawhan mahibawo kun kinsa ang angay ug dili angayan ibutang sa posisyon sa gobyerno.

“Og ma-confirm so angayan ra sad siguro para sad sa ingon mahunong na gyud ning mga drugas nga naay suspected nga mga politicians nga nagpaluyo nga nagprotehir niining mga illegal nga drugas, para nako mas maayo na para sad ang mga tawo dili masayop sa pagpili”, ni Tumulak pa.

Miingon siya nga sa verification process, angayan nga dunay active involvement sa Philippine National Police, Department of Interior and Local Government ingon man sa komunidad.

Kun kini verified na, ang mga concerned agencies angay mopasaka og kaso batok sa mga narco politicians aron sab paghatag sa ilaha og higayon nga makadepensa sa ilang kaugalingon.

Ang Konsehal midugang katong mga maapil sa narcolist dili nalang angay matod pa mopadayon sa ilang kandidatura sa May 2019 Elections. Sa iyang bahin, ang Mayor sa Tuburan nga si Aljon Diamante pabor usab nga nganlan kadtong mga narco politicians sa di pa moabot ang eleksyon.

Suportado sa Presidente sa League of Muncipalities in the Philippines (LMP) Cebu Province chapter sa plano sa DILG ug PDEA nga ipagawas ang narcolist.

“Mas maayo panganlan para dili suspect ang tanan unya pwede pud lage katong mga candidates nga suspected pud, dapat pud ma verify pud to siya daan” matod ni Diamante.

Sa laing bahin, gihimakak sa Police Regional Office-7 nga adunay mga polis sa ilang gihuptang drug matrix sa drug lord nga si Rustico Ygot.

Sa report sa Philippine Star, sa grupo ni Ygot nalambigit ang usa ka membro sa intelligence unit sa Philippine Coast Guard ug tulo ka mga polis nga adunay mga ranggo nga staff sergeant, corporal ug patrolman.

Sa maong report, giingong milusad og manhunt operation batok sa upat si Police Brigadier General Debold Sinas.

Apan kining tanan gihimakak ni Sinas atol sa press conference kagahapon.

Matud ni Sinas,  nga ang matrix nga anaa nila gikan sa mga dinakpang link ni Ygot. —Camille Pateres ug Le Antojado/LPM (BANAT NEWS)