Giingong hitman nakaeskapo gikan sa prisohan

CEBU, Philippines – Piniriso nga kanhi kapitan sa Barangay Lugo, lungsod sa Borbon kinsa giingong usa usab ka hitman ug durugista ang nakaeskapo niadtong Martes sa gabii gikan sa Medellin District Jail. Ang tigpamaba sa Bureau of Jail Management and Penology (BJMP) Jail Senior Inspector Rolly Bandeling nagkanayon nga atol sa accounting sa mga piniriso mga alas 7:00 sa gabii wala na ang usa sa mga binilanggo nga si Jinnifer Mercader.

Sa ilahang imbestigasyon nasuta nga nikatkat diha sa upat ka metros nga perimeter fence ang maong piniriso ug giingong gibinat niini ang barb wire sa ibabao. Matud ni Bandeling nga walay gigamit nga ekipo sa iyang pag-eskapo si Mercader.

Ang mga tigdumala sa prisohan gipaubos kini karon sa imbestigasyon kabahin sa maong hitab

Giingong wala’y nakuhang footage sa Close Circuit Television (CCTV) camera ang pag-ikyas ni Mercader tungod kay giingong walay camera nga nag-atubang diha sa koral sa prisohan.

Gihulagway nga “armed and dangerous” ni Police Brigadier General Debold Sinas, direktor sa Police Regional Office- 7 si Mercader kinsa adunay kaso kabahin sa ginadiling drugas ug paghupot og ilegal nga armas. Si Sinas nipahimangno sa publiko nga mo-report dayon sa kapolisan kon makit-an nila ang maong pugante

Si Mercader nadakpan pinasikad sa search warrant niadtong Septiyembre 2, 2017 diin nasakmitan kini og drugas ug pipila ka paltik nga armas.

Una nang giangkon ni Mercader dihang nadakpan kini nga dul-an sa 30 ka kriminal na ang iyang napatay ubos sa sugo sa usa ka politiko. (Romeo T. Limpangog/BDB)(BANAT NEWS)