17 ka lugar ipaubos sa EWAS
CEBU, Philippines – Wala pa aprubahi sa Commission on Elections (Comelec) ang girekomendar sa kapolisan nga 17 ka mga lungsod ug dakbayan sa Lalawigan sa Sugbo nga ipaubos sa election watchlist area (EWA) alang sa umaabot nga piniliay.
Niadtong Martes ang Comelec uban sa kapolisan nipahigayon og laing tigum alang sa update sa security plan sa probinsiya sa umaabot nga eleksyon.
“Initially nag-present pa man sila, 17 ka mga municipalites and cities nga among mabutang sa EWAs or area of concern” butyag ni Jerome Brillantes ang acting provincial election supervisor.
Ang rason sa rekomendasyon ,mao nga “highly contested” ang mga lugar ug adunay presensiya sa armadong mga tawo.
Matud ni Brillantes nga iya pang i-review ang rekomendasyon sa kapolisan sanglit wala pa siya matagbaw sa pagkakaron kun angayan bang ipaubos sa EWAS ang maong mga lugar.
Wala pa hinuon mabutyag ni Brillantes kun unsa kini nga mga lungsod ug dakbayan.
“...I recommend it to be thoroughly and re assessed and re-examined. I’m not satisfied sa presentation, sa grounds... as for me dili pa gyud angayan ibutang og wathlist” matud ni Brillantes kinsa midugang nga kinahanglan usab ang Comelec nga mag-amping sa pag-aprubar niini tungod sa posibleng epekto sa mga tawo.
“The effect of that, ang interpretation sa mga tawo. Although ang kuan gyud namo ana kay more on security”, dugang ni Brillantes.
Apan sa Lungsod sa San Fernando, sumala sa acting election supervisor nga iyang irekomendar nga magbutang og upat ka PNP personnel sa matag polling place.
Kini gumikan sa sunod-sunod nga pagpatay sa mga kandidato sa lungsod karong tuiga. (/DILT)(BANAT NEWS)
- Latest
