Mga supplier giawhag moapil sa pre-bidding sa buses
CEBU, Philippines – Giawhag ang tanang interesadong supplier nga moapil sa pre-bidding conference alang sa procurement sa 19 ka buses nga nagkantidad og P152 milyones nga gitagana alang sa Business Process Outsourcing (BPO) workers karong Huwebes. Ang pangulo sa Cebu City Bids and Awards Committee Ronaldo Malacora nagkanayon nga mopahigayon sila og pre-bidding conference sa ikaduhang higayon sanglit ang first bidding napakyas gumikan kay walay interesadong bidders ang nipatim-aw niadtong buwan sa Enero.
Atol sa pre-bidding conference ang mga supplier pahibaw-on sa salient features sa terms and condition nga naa sa procurement contract ug ubang importanteng rekisitos sa city government.
Matud ni Malacora usa kini ka open discussion tali sa BAC members ug mga supplier.
Ang 19 ka buses mga air-conditioned unit nga dunay seating capacity nga 50 ug ang venue sa pre-bidding conference anha sa buhatan sa Department of General Services, 7th floor, executive building sa Cebu City Hall.
Kon ma-deliver na ang mga bus ihulip kini sa mga existing bus nga maoy gigamit aron mopasakay sa mga BPO workers.
Sukad niadtong Nobiyembre 12 ang kagamhanan sa siyudad nitanyag og free bus ride subay na sa nahitabong kamatayon sa usa ka call center agent nga biktima sa pagpanulis diha sa Barangay Mabolo.
Base sa record sa DGS dunay unom ka city-owned buses ug vehicles nga nag-transport sa mga BPO worker nga gi-deploy sa upat ka identified routes. (/BDB)(BANAT NEWS)
- Latest
