Kampanya batok tipdas gihimo

CEBU, Philippines — Tungod sa nagsakang gidaghanon sa mga nasakit sa tipdas, mipahigayon og Regional Information Campaign on Vaccination and Immunization ang Department of Health sa rehiyon nga gipangulohan ni Dr. Jaime Bernadas ug ni Presidential Assistant for the Visayas, Michael Dino. Nunot kini sa nagkataas nga kaso sa maong sakit sa Central Visayas hinungdan nga gideklara na ang outbreak sa rehiyon.

Gihimo sa Brgy. Duljo-Fatima, Cebu City ang unang information caravan diin si Dr. Bernadas nagkanayon nga ang katuyoan sa maong kalihukan mao ang pag-awhag sa mga ginikanan sa pagdala sa ilang mga anak ngadto sa mga health centers aron mabakunahan.

Gawas sa health centers mahimong magpabakuna sa Provincial Health Office, mga ospital sa gobyerno ingon man sa buhatan sa DOH-7. Ang kampanya usab nagpahibalo sa mga schedule sa immunization diha sa mga health centers ingon man sa uban pang programa sa pagpamakuna.

"Safe, tested and proven so dili kita angay nga mahadlok. Kini lamang ang atong paglaum nga mapugngan nato ang pagkaylap sa mga vaccine-preventable diseases labi na gyud ang measles," matud pa ni Bernadas.

Gipahibawo usab niini nga sa uwahi nilang datus, anaa ra sa 49 porsiyento sa kabataan nga nabakunahan ug karon gusto nila nga maabot ang 100 porsiyento nga target mao nga wala silay hunong sa pagpamakuna.

Lakip sa nanawagan sa mga ginikanan nga pabakunahan ang ilang mga anak batok tipdas mao si Presidential Assistant for the Visayas Michael Dino kinsa nabalaka usab sa nahitabong outbreak.

"Yes, we have to do this to let the people know nga walay ikahadlok kong nganong magpa-vaccine ang ilahang mga bata," matud pa ni Dino. Ang maong kalihukan kagahapon maoy sinugdanan diin sundan kini sa uban pang mga ahensya sa gobyerno nga maoy moadto sa kabarangayan aron sa pagpahigayon og immunization ug pagpasabot nga luwas kini. (Joevelon G. Pinay/DILT)(BANATNEWS)