Kalambuan sa kadalanan suportado sa CCTO

CEBU, Philippines — Suportado sa Cebu City Transportation Office (CCTO) ang giduso nga konstruskyon og underpass, skyway, bypass road, ug flyover sa siyudad sunod tuig aron mapalambo pa ang trapiko sa dakbayan.

Nanghinaut si CCTO operations chief Francisco Ouano nga walay mobabag sa maong mga proyekto kay makatabang kini sa pagsulbad sa nagkagrabe nga trapiko sa siyudad.

“Tanang mga additional nga road networks, amo gyud suportahan sa CCTO kay nagkadaghan gyud ang mga sakyanan ug mao ra gihapon ang kadalanan sa siyudad,” sigon niya.

Dugang niini nga angay nga magtinabangay ang lokal ug nasudnong gobyerno sa pag-implementar og maayong mass transport system ug gikinahanglang mga infrastructures.

Mapasalamaton siya sa Department of Public Works and Highways-7 nga maoy miduso sa maong pre-construction phases sa mga projects inig 2020.

Kahinumduman nga ang Cebu City Development Council mo-endorso og P6 billion worth of infrastructure projects ngadto sa Regional Development Council-7 karong buwana.

Ang DPWH miduso og P4.77 billion nga mga projects alang sa Cebu City ug kadaghanan niini ang feasibility studies ug detailed engineering design.

Apil niini ang P165.7 million alang sa feasibility study alang sa Mambaling South Boulevard to Cebu South Coastal Road Extension ug laing P290 million alang sa detailed engineering design alang sa underpass, skyway, ug flyover.

Ang underpass giduso nga i-construct sa may Juan Luna Ave. cor. Cardinal Rosales Ave. ug Archbishop Reyes Ave. corner Juan Luna Ave. samtang ang skyway himuon sa General Maxilom Ave. corner M.J. Cuenco Ave. ug M. Gotianuy St. ug Rahman St.

Ang flyover giduso nga himuon sa Osmeña Blvd. corner N. Bacalso Ave. ug P. del Rosario St. corner Leon Kilat St. samtang laing P40 million giduso alang sa detailed engineering design sa construction sa Guadalupe – Lahug Bypass road. Matud ni Ouano nga tanang improvements makatabang sa pag-decongest sa mga kadalanan ilabi na during peak hours.

“Daku na kaayo nag ikatabang sa syudad kon naay daghang infrastructure projects kay behind na kaayo ta. Cebu City is next to Manila raba gyud maong dapat napud mo-step up ang syudad ug hopefully i-set aside ang mga political issues kay ang mga tao mag suffer,” matud niya. (/DILT)(BANATNEWS)