Peace covenant sa mga kandidato sa Cebu himuon
CEBU, Philippines – Mopahigayon og peace covenant signing ang Cebu Provincial Police Office (CPPO) alang sa mga kandidato sa Lalawigan sa Sugbo sa umaabot nga eleksyon.
Ang CPPO mipadala og sulat ngadto sa Office of the Provincial Election Supervisor (OPES) sa Sugbo aron sa pagpadangat sa maong tinguha. Ang maong kalihukan nagtinguha sa hapsay ug malinawon nga piniliay.
“We would be honored to have you stand as witness during the signing of the Peace Covenant on February 19, 2019 at Saint Francis of Assisi Parish Church, City of Naga, Cebu.” pagbasa sa sulat sa hepe sa CPPO PSupt. Manuel Abrugena ngadto kang acting election supervisor sa Sugbo Atty. Jerome Brillantes.
Samtang, dili momenus 27 ka mga magtutudlo gikan sa pampubliko nga eskwelahan sa Lungsod sa San Fernando ang wala na gyud modayon pa nga mahimong sakop sa electoral board sa umaabot nga piniliay sa Mayo 13.
Matud ni Renante Angcos, ang election officer sa naasoy nga lungsod nga 150 ra ka mga magtutudlo ang misaad nga mahimong EB.
“Wala ko kaabot sa akong quota, mangita pa ko sa 27. Gi-workout na namo karon,” butyag ni Angcos.
Nasayran nga ang San Fernando nanginahanglan og 177 ka magtutudlo nga moserbisyo sa umaabot nga midterm election.
Ang maong lungsod adunay sobra 400 ka mga maestra sa pampublikong tunghaan.
Matud ni Angcos nga didto na sila miduol sa mga magtutudlo sa mga pribadong tunghaan diin nakakuha na sila og 15 nga buot moserbisyo sa umaabot piniliay. (/DILT)(BANAT NEWS)
- Latest
