Mga magtutudlo sa San Fernando miatras sa piniliay

CEBU, Philippines – Dili momenus 20 ka mga magtutudlo gikan sa mga pampublikong tunghaan sa Lungsod sa San Fernando ang miatras nga mahimong electoral board sa umaabot nga piniliay karong Mayo 13, 2019.

Gitug-an sa election officer sa maong lungsod, Renante Angcos nga sukad pa sa miaging semana, ubay-ubay na nga mga magtutudlo ang mibalibad sa Comelec nga magsilbi sa eleksiyon.

“Well ang reason gyud nila is primarily dili sila sigurado sa ilang safety, sa ilang security” matud ni Angcos.

Ang kahadlok sa mga magtutudlo nagsugod subay sa sunod-sunod nga nahitabong pagpamusil ug patay sa ilang lugar. Gani ang labing uwahing hitabo mao ang pagpamanhig sa mayor diin namatay gyud ang bana niini nga si ABC president Ricardo “Nonoy” Reluya Jr. ug duha pa ka mga kauban.

Gani ang Comelec ug ang kapolisan nipahigayon og pakigpulong sa mga magtutudlo diin ilang gipaniguro ang ilang kaluwasan kon sila mosilbi sa piniliay.

Matud ni Cebu Provincial Police Office director, PSSupt. Manuel Javier Abrugena nga niadtong nakalabayng mga semana nakig-istorya sila sa mga magtutudlo kabahin sa sitwasyon sa lugar nga gibutang na sa red category sa Election Watchlist  Areas (EWAs).

“We will maximize our police presence in San Fernando prior to Election Day and continuous po ang dialogue natin sa kanila (mga guro),” tug-an ni Abrugena sa Banat News.

Adunay nasigpatang intense political rivalry ug posibleng presensiya sa armadong grupo sa San Fernando hinungdan nga gisang-at kini sa red category nunot usab sa sunod-sunod nga patay sa mga opisyal sa lungsod.

Ang Comelec sa lungsod mihatag og ultimatum sa mga magtutudlo nga mosumiter sa ilang intensyon kini aron masuta kon pila ang moatras ug mopadayon nga moserbisyo sa eleksyon.

Nasayran nga ang San Fernando nanginahanglan og 177 ka mga electoral board mao nga sila nagpadayon sa pag-awhag sa mga magtutudlo nga dili lang moatras kay daku kaayo sila og tabang sa pagpahigayon unya sa piniliay.

Nunot niini aduna silay giandam nga Plan B diin magpatabang sila sa mga magtutudlo sa private schools sa lugar.

“This office made a representation to the different private schools in San Fernando, maayo man nuon ang feedback, naa man pud willingness nila” matud ni Angcos. (Camille L. Pateres/DILT)(BANAT NEWS)