2-anyos patay sa tipdas

CEBU, Philippines – Usa ka dos anyos nga bata ang labing uwahing biktima sa tipdas nga nakalas didto sa Lalawigan sa Sugbo.

Kini ang taho sa Department of Health 7 diin ang maong dos anyos lakip na karon sa nagkadaghang kaso sa mga namatay tungod sa maong sakit.

Ang Regional Epidemiology and Surveillance Unit miingon nga anaa na sa 169 ka mga kaso ang ilang natala ug 47 niini ang konpirmado sa laboratory.

Ang Sugbo maoy nag-una sa daghan kaso sa tipdas nga anaa sa 119,  samtang ang Negros Oriental, Bohol ug Siquijor adunay 39, 10 ug usa ka kaso, matag usa.

Tungod sa outbreak sa tipdas ang DOH-7 nibukas kagahapon sa buntag sa ilang measles vaccination post nga gipahimutang sa parking area sulod sa buhatan sa panglawas nga anaa sa Osmeña boulevard. Ang ceremonial vaccination gipangulohan ni Dr. Sophia Mancao, pangulo sa Regulation, Licensing and Enforcement Division.

Samtang didto sa Talisay City, nibalik na pagpabakuna ang pipila ka mga ginikanan nga unang mibalibad sa vacine sa tipdas tungod sa kontrobersiyal nga Dengvaxia vacine.

Kini maoy gitug-an ni Lynde Decipolo, kinsa Barangay Nutrition Scholar (BNS) sa Barangay Biasong kagahapon atol sa ilang eskedyul nga pagpamakuna.— Gabriel Bonjoc/LPM (BANAT NEWS)